放假又要諗去邊到玩？如果要搵一個地方遠離市區煩囂，又想享受吃喝玩樂，咁大嶼山絕對係一個好選擇！大嶼山作為全港最大嘅島嶼，你對呢個地方又有幾多認識？想唔想知大嶼山有咩玩？今日就等 ReUbird 小編為你整合8個大嶼山好去處，一文睇晒大嶼山必去景點同大嶼山交通資訊。
呢篇文將會介紹大嶼山一日遊嘅好去處：
- 昂坪（天壇大佛、昂坪市集、昂坪360、心經簡林）
- 愉景灣（三角教堂、D'Deck露天美食區）
- 大澳漁村（棚屋、彩色壁畫打卡牆）
- 梅窩（袁氏大屋、銀礦灣沙灘）
- 鳳凰徑、大東山
- 泳灘及泥灘（長沙泳灘、貝澳泳灘、水口泥灘）
- 大嶼山露營車
- 東薈城
1. 昂坪
講起大嶼山玩樂，第一時間一定會諗起昂坪！其實成個昂坪都有好多景點，包括昂坪360纜車同埋昂坪市集，或者寶蓮禪寺、天壇大佛等，無論係情侶定係一家大細去一日遊都非常適合！
昂坪360 + 昂坪市集
纜車連接東涌市區同昂坪，係前往昂坪最快同最有特色嘅交通工具。沿途可以欣賞大嶼山山脈優美嘅景致，同埋無邊際嘅南中國海，唔怪得被譽為世界十大最佳纜車體驗喇！
交通資訊：東涌地鐵站B出口
票價（依昂坪360官方網站為準）：
| 成人 | 小童（3-11歲） | 長者（65歲以上） | |
| 標準車廂 | $235 | $110 | $155 |
| 水晶車廂 | $315 | $190 | $235 |
圖片來源：昂坪360
纜車總站就係昂坪市集。市集嘅建築設計非常有中國傳統特色，仲同附近嘅自然環境融合得天衣無縫。市集除咗有遊客中心、紀念品商店之外，仲有幾十間囊括中外美食嘅餐廳，保證你唔會餓住肚咁參觀。
圖片來源：kkday
天壇大佛 + 寶蓮禪寺
離開昂坪市集，可以見到世界聞名嘅天壇大佛！作為全球最高嘅戶外青銅坐佛，天壇大佛每年吸引唔少中外遊客之餘，更加成為香港嘅標誌景點。一場嚟到大嶼山，又點可以唔去參觀吓！
圖片來源：香港旅遊發展局
由天壇大佛落返嚟，可以去埋附近嘅寶蓮禪寺。寶蓮禪寺最早可以追溯到1906年嘅大茅蓬道場，至今已經超過一百年歷史。禪寺入面嘅建築相當有氣勢，包括大雄寶殿、萬佛殿等都係非常壯觀嘅佛教傳統建築。除咗參觀，遊客仲可以品嚐禪寺提供嘅素菜或者小食，絕對係難得嘅體驗。
圖片來源：香港旅遊發展局
2. 愉景灣
愉景灣係香港最具異國特色嘅地方之一，唔少食物同建築都偏向西式風格。最著名嘅三角形海濱白教堂更加係打卡勝地，仲有全港最大嘅臨海露天美食區D'Deck，俾你同親朋好友一齊嘆海景嘆美食，真係好chill！
愉景北海邊禮堂
三角形教堂嘅落地大玻璃，映照出背後嘅藍天白雲，實在太啱情侶影相打卡啦。
圖片來源：GirlsMood
臨海露天美食區D'Deck
D'Deck有唔同嘅餐廳提供多國美食佳餚，喺露天環境下望著180度海景，一路享受大嶼山美食，真係好嘆！
圖片來源：travelwithkaka
交通資訊
| 交通工具 | 上落客位置 | 車費/票價 | 班次 |
| 渡輪 | 中環三號碼頭 <--> 愉景灣碼頭 |
$46 |
航班時間表 |
| 巴士 | DB01R線：東涌 <--> 愉景廣場巴士總站 |
$12 |
巴士班期 |
| DB03R線：欣澳 <--> 愉景廣場巴士總站 |
想睇愉景灣更詳細嘅介紹，可以㩒入【玩轉愉景灣】愉景灣一日遊 2024 | 最齊全愉景灣交通酒店景點介紹 睇更多資訊。
3. 大澳漁村
大澳係香港現存最古老嘅漁村之一，以棚屋為主嘅建築特色令唔少都市人都覺得眼前一亮，亦有人專程入大澳買特色蝦醬。你可以喺大澳掃街搵美食，或者漫步欣賞沿路風景，體驗第二度搵唔到嘅漁村風光。
棚屋
沿住水道而建嘅棚屋已經有百多年嘅歷史，喺橋上行一轉欣賞棚屋海景，或者參加遊船河活動，你就會明白點解大澳被稱為東方威尼斯啦。
圖片來源：Instagram @a_ka_a_
彩色壁畫打卡牆
近年嘅藝術活化計劃進一步增添咗大澳嘅藝術文化氣息，壁畫記載住大澳嘅水鄉風情，散落喺島上唔同嘅地方，值得你漫遊大澳時一一發掘。
圖片來源：hkppltravel
交通資訊
| 交通工具 | 上落客位置 | 車費/票價 | 班次 |
| 渡輪 | 屯門碼頭或東涌 <--> 大澳 |
星期一至六：$21.6(普通船)，$27(快船) 星期日及公眾假期：$27(普通船)，$32.5(快船) |
航班時間表 |
| 巴士 | 11號線：東涌站巴士總站 <--> 大澳 |
星期一至六：$12.8 星期日及公眾假期：$21.1 |
巴士班期 |
想睇大澳更詳細嘅介紹，可以㩒入【2021大澳一日遊】穿梭舊棚漁村 最強休閒遊攻略：遊覽路線/特色餐廳/文青藝術 睇更多資訊。
4. 梅窩
梅窩可以話係非常就近嘅大嶼山一日遊嘅地方，交通亦較為方便，吸引唔少人假日入去兜個圈。入到梅窩可以踩單車、嘆美食、望海景，更可以觀賞歷史遺址，體驗不一樣的放鬆假日。
袁氏大屋
袁氏大屋係由花崗石築成嘅堡壘型建築，喺二次大戰時期發揮監視同抵抗外敵嘅功用，被評為二級歷史建築，好值得去感受吓呢度嘅歷史意義。
圖片來源：trip.com
銀礦灣泳灘
梅窩一日遊又點可以錯過最美日落？由梅窩碼頭步行約15分鐘就可以到達銀礦灣沙灘，喺度望住夕陽在海面緩緩降落，享受屬於你最休閒嘅me time。
圖片來源：香港01
交通資訊
| 交通工具 | 上落客位置 | 車費/票價 | 班次 |
| 渡輪 | 中環六號碼頭 <--> 梅窩碼頭 |
星期一至六：$16.6(普通船)，$32.8(快船) 星期日及公眾假期：$24.6(普通船)，$47.1(快船) |
航班時間表 |
| 巴士 | 3M號線：東涌站巴士總站 <--> 梅窩碼頭 |
星期一至六：$11.4 星期日及公眾假期：$17.8 |
巴士班期 |
想睇梅窩更詳細嘅介紹，可以㩒入【梅窩一日遊】瀑布美如仙境、昔日戰爭痕跡！梅窩必去古蹟景點、地道美食推介 睇更多資訊。
5. 鳳凰徑、大東山
如果你係山系少年，咁就一定要去吓大嶼山嘅鳳凰徑。鳳凰徑全長70公里，分成十二段。從伯公坳沿鳳凰徑上大東山，全場6公里，約需3小時，沿路更加有機會觀賞到景色超美嘅芒草海。除此之外，喺大東山睇日出日落都係個擁抱自然美景嘅好選擇。呢條路線都唔容易㗎，記得搵返個伴同埋做好準備先出發啊！
日落中的芒草海
夕陽西下，想像自己站在大東山山頂。涼風吹過輕撫你嘅臉頰，置身於一片隨風搖曳嘅芒草海之中，望住海灣同天際線嘅壯闊景色，真係夫復何求！係咪即刻好想叫埋一班老友一齊行山，享受大嶼山美景呢？
圖片來源：香港旅遊發展局
交通資訊
| 交通工具 | 上落客位置 | 路線 | 車費 | 班次 |
| 巴士 | 東涌市中心巴士總站 前往 伯公坳起點 |
11號 |
星期一至六：$12.8 星期日及公眾假期：$21.1 |
巴士班期 |
|
23號 |
星期一至六：$18.7 星期日及公眾假期：$31 |
巴士班期 | ||
|
3M號 |
星期一至六：$11.4 星期日及公眾假期：$17.8 |
巴士班期 |
想睇大東山更詳細嘅介紹，可以㩒入【大東山芒草】大東山詳細攻略懶人包！（附事前準備，交通，打卡熱點及注意事項） 睇更多資訊。
6. 泳灘及泥灘
夏日炎炎最適合享受陽光與海灘！以下為你介紹大嶼山兩大著名泳灘，特別適合喜歡戶外活動和水上活動嘅你。除咗泳灘之外，泥灘都係另一個夏日好去處，適合一家大細或者三五知己一齊去摸蜆，過一個清涼嘅下午。
長沙泳灘
長沙泳灘係全港最長嘅泳灘，全場3公里，有分上長沙及下長沙，兩個泳灘都各有特色。上長沙泳灘有公眾BBQ爐，最啱嘆返幾隻燒雞翼。而下長沙泳灘就有水上活動中心，可以租借水上活動用具。因為長沙泳灘比較大浪，好適合鍾意衝浪嘅朋友嚟，戶外活動完咗之後仲可以喺唔同嘅海邊餐廳度嘆美食添！
圖片來源：getreadyhk
前往長沙泳灘的交通資訊
| 交通工具 | 上落客位置 | 路線 | 車費 | 班次 |
| 巴士 |
東涌大嶼山巴士站 前往 下長沙村站 |
2號 |
星期一至六：$18.7 星期日及公眾假期：$31 |
巴士班期 |
|
11號 |
星期一至六：$12.8 星期日及公眾假期：$21.1 |
巴士班期 | ||
|
梅窩碼頭 前往 下長沙村站 |
1號 |
星期一至六：$11.6 星期日及公眾假期：$19.5 |
巴士班期 | |
|
4號 |
星期一至六：$6.1 星期日及公眾假期：$11.9 |
巴士班期 |
貝澳泳灘
貝澳泳灘被稱為香港最美沙灘之一，岸邊有幾家餐廳同水上活動用品租借店，同樣都適合水上活動發燒友去玩水。除此之外，貝澳沙灘後面嘅平湖更加係一個隱世打卡景點！當天氣好又退潮嘅時候，湖面就會映照出藍天白雲，形成天空之鏡。喺超廣闊的水平線上面影相打卡，唔使出國都影到靚相啦！
圖片來源：寶兒媽咪的blog
前往貝澳泳灘的交通資訊
| 交通工具 | 上落客位置 | 路線 | 車費 | 班次 |
| 巴士 |
東涌大嶼山巴士站 前往 貝澳新圍村站 |
11號 |
星期一至六：$12.8 星期日及公眾假期：$21.1 |
巴士班期 |
水口泥灘
水口村對出嘅泥灘係一個摸蜆熱點，吸引好多父母帶小朋友嚟掘蜆同玩泥沙。只需要喺附近士多租借摸蜆工具，就可以係度花上一整日。不過值得留意嘅係，摸蜆活動會破壞生態，大家記得要適可而止。細蜆就要埋返入土，保護生態發展啊！
圖片來源：getreadyhk
前往水口泥灘的交通資訊
| 交通工具 | 上落客位置 | 路線 | 車費 | 班次 |
| 巴士 |
東涌大嶼山巴士站 前往 水口村站 |
11號 |
星期一至六：$12.8 星期日及公眾假期：$21.1 |
巴士班期 |
7. 大嶼山露營車
因為疫情困住咗喺香港好耐？不如去大嶼山嘅露營車過返個兩日一夜staycation，當送自己一個特別嘅旅行！以下為你介紹露營車有咩好玩，仲會為你推介三間熱門嘅大嶼山露營車，大家有興趣都可以click入佢哋嘅網站睇睇！
露營車設備齊全，包埋Wi-Fi、電視、獨立洗手間、冷氣系統、雪櫃等，部分仲有得BBQ添。
圖片來源：gotrip
大部分大嶼山露營車都位於海灘旁邊，大家日頭可以組團去玩盡水上活動，例如滑浪風帆同獨木舟等。
圖片來源：poplady
而且營地附近更加有唔少遊玩設施，例如兒童遊樂場、彈床、單車徑等。有啲營地仲可以喂羊，親親大自然嘅活動，絕對適合父母帶小朋友嚟放電。
圖片來源：JK Club
大嶼山長沙下村：浪高長岸露營車
地址：香港大嶼山長沙下村29號
交通資訊：由東涌大嶼山巴士站出發，乘搭2號或11號巴士前往下長沙村站，再步行約3分鐘至營地。
大嶼山長沙：海迎灘露營車
地址：大嶼山嶼南道57號
交通資訊：由東涌大嶼山巴士站出發，乘搭11號巴士前往蝶崗站，再步行約2分鐘至營地。
網站：https://welcomebeach2020.wixsite.com/welcomebeach
大嶼山貝澳：JK Club 貝澳露營車會
地址：大嶼山貝澳老圍村20 D
交通資訊：由東涌大嶼山巴士站出發，乘搭3M號巴士前往老圍村站，再步行約2分鐘至營地。
8. 東薈城
夏日熱辣辣，戶外活動玩到攰，咁就可以去東薈城兜返個圈涼冷氣！東薈城係香港最大型嘅outlet，除咗shopping之外，仲有超過40間餐廳等緊你。你仲可以去入面9000呎大嘅food court食代館慢慢揀，包你一定搵到好嘢食！以下推介3間東薈城美食餐廳，鍾意各國美食嘅你絕對不可以錯過！
交通資訊：東涌地鐵站C出口
圖片來源：ulifestyle
泰潮
泰潮係一間泰國菜專門店，已經喺2011-2020連續10年奪得米芝蓮推介！餐廳由正宗泰國廚師炮製菜式，務求為食客送上最地道嘅泰式料理。店內招牌菜包括海南雞飯、三色船粉同三色糯米飯。
圖片來源：Openrice
地址：東薈城2期704號舖食代館6號舖
鍋處
鍋處係一間專做壽喜燒同涮涮鍋嘅日式餐廳，以大眾化價錢提供定量套餐或任食放題，可以食到澳洲M4和牛、日本黑毛和牛等。鍾意shabu shabu或者壽喜燒嘅你，同親朋好友一人一鍋就最方便唔使爭！
圖片來源：Openrice
地址：東薈城名店倉3樓317號舖
天后站清湯腩
喜歡港式食物就一定要試吓呢間嘅清湯牛腩飯，主廚兼創辦人蘇師傅曾經坐鎮一間位於天后嘅清湯腩店，並獲得米芝蓮嘅美譽。如今自立門戶，食物味道卻始終不變。仲有招牌菜清湯牛腩飯，個個都讚不絕口，牛腩味道濃郁但絕不肥膩，值得一試！
圖片來源：Openrice
地址：東薈城2期704號舖食代館7號舖
睇完係咪好想即刻起行去玩盡大嶼山？除咗大嶼山一日遊之外，其實香港仲有好多離島地方都好值得大家去遊覽。你可以睇埋 ReUbird 為你準備嘅 蒲台島一日遊、坪洲一日遊、鶴咀一日遊等玩樂遊記，plan定下次要去邊到玩！記得follow埋 ReUbird IG，緊貼住我哋推介嘅美食餐廳同香港好去處。
閱讀其他文章：
- 【今日好去處】嚴選香港熱門玩樂景點、活動及盛事推介（不斷更新）
- 【屯門好去處 2021】精選 7大玩樂活動 | 朋友、情侶、親子必去熱點
- 【石澳好去處】最齊全的石澳攻略 · 打卡行山燒烤BBQ盡在石澳