講到煲仔飯，大家係咪已經諗到香噴噴嘅飯香、脆卜卜嘅金黃飯焦呢？冬天食完成個人即刻暖笠笠，連小編都開始覺得肚餓喇！
煲仔飯作為香港嘅代表性食物之一，唔單止深受香港人歡迎，就連遊客都一試難忘。
而家就等ReUbird小編為大家精選9間必食煲仔飯，帶大家行匀全香港各區米芝蓮推薦鋪頭啦！
文章有以下三部份：
【港島區】西環、筲箕灣——煲仔飯必食名店
【坤記煲仔小菜】
位於西環嘅坤記煲仔飯，開業多年以來一直都好高人氣，仲得到米芝蓮必比登推介，鋪頭長時間排長龍，去食嘅朋友記得要提早電話預約啊～
坤記採取即叫即做制度，煲仔飯全部都係新鮮滾熱辣，足料又抵食，仲有濃郁嘅炭香味，以高質素嘅瓷煲烹煮，保留原有嘅傳統。
小編推薦👍
白鱔滑雞煲仔飯 $115
呢道嘅必食招牌菜！白鱔超足料，一煲就有4-5嚿，肥美得嚟又唔會腥。加入咗辣椒、豆豉同蔥花，味道層次豐富。食入口米香味濃郁，飯焦加埋甜豉油，簡直係天作之合！
窩蛋牛肉飯 $93
呢度嘅窩蛋牛肉飯唔係用牛肉餅，而係用新鮮滑牛，保留牛肉原味同質感。足料之餘賣相仲好吸睛，有大大粒蛋黃，攪落去蛋黃汁滿滿，真係流曬口水！
坤記煲仔小菜
營業時間：星期一至六 11:00 - 14:30 / 18:00 - 22:30 星期日 18:00 - 22:30
前往途徑：西營盤站 B1 出口步行2分鐘
電話：2803 7209
更多資訊：Openrice
圖片來源：Openrice
想知道更多西環嘅美食？Click入呢度睇下啦！
【嚐囍煲仔小菜】
圖片來源：Uber Eats
呢間舗係由上面介紹嘅坤記煲仔小菜前師傅所經營，深受附近街坊歡迎，同樣連續獲得米芝蓮必比登推介。最難得嘅係所有料理都唔會用味精，行原汁原味路線。
呢度亦都出名用炭燒整煲仔飯，烹調過程中香氣充斥店舖每一個角落。由經典嘅臘味滑雞飯到新穎嘅日式鰻魚煲仔飯都有，種類五花八門。飯粒煲至粒粒分明亦唔會過硬，仲有可以成塊起出黎嘅香脆嘅飯焦！
不過留意煲仔飯下午6點後先供應，想試食嘅朋友記得喇！
小編推薦👍
白鱔田鷄煲仔飯 $88
白鱔係呢度嘅招牌，幾乎每一枱都會叫。白鱔油脂香氣十足，田雞夠晒爽滑，整體口感十分豐富惹味。食嘅時候記得將所有食材攪拌均勻，先係享用煲仔飯嘅最佳方式啊~
臘味滑鷄煲仔飯 $88
鍾意食傳統口味嘅你絕對值得一試！雞肉夠晒嫩滑，仲有香濃嘅臘腸。米飯帶有臘腸香同油香，一上菜炭香味撲鼻，未開蓋已經垂涎三尺！
嚐囍煲仔小菜
營業時間：星期一至日 06:00 - 16:00
前往途徑：堅尼地城站 B 出口步行約2分鐘
外賣服務：有
電話：2819 6190
更多資訊：Openrice
圖片來源：Openrice
【紹華小厨】
圖片來源：Openrice
老闆曾經係銅鑼灣川龍街新翠華嘅厨師，後來另起爐灶。憑住多年來嘅磨練，得來精湛純熟嘅煲仔飯手藝。煲仔飯種類繁多，一共有30幾款，由傳統到自創嘅都好受歡迎，新穎嘅配搭更加引嚟唔少後生仔幫襯。
雖然佢地同傳統嘅煲仔飯店唔同，選用煤氣爐烹製，但仍然將色香味發揮得淋漓盡致，做出煲仔飯獨有嘅焦香風味同神髓。
小編推薦👍
野菌鵝肝煲仔飯 $85
同傳統煲仔飯口味有別，呢個配搭真係好少見，但係會俾到你意想不到嘅驚喜。成個煲仔飯大概有10粒鵝肝左右，粒粒真材實料，配上口感豐富嘅什菌，味道更上一個層次！
圖片來源：Openrice
紹華小厨
營業時間：星期一至日 07:00 - 23:00
前往途徑：筲箕灣站 B3 出口步行約3分鐘
電話：8199 8188
詳細介紹：Openrice
圖片來源：Chikpi's EatEatShare
【祥囍煲仔小廚】
圖片來源：Deliveroo
呢間煲仔飯嘅位置比較隱蔽，可能需要花少少時間先揾到。老闆有20多年煮煲仔飯經驗，技巧純熟，質素信心保證。唔單止堅持每個煲仔飯即叫即煲，就連醬油都係以自家配方調製，實在好有心機。
煲仔飯份量大，夠2-3人食，滿滿一煲就有好多餸。同樣都係長龍名店，大家想食就記得提早預約喇！
小編推薦👍
臘味蝦乾飯 $80
連大廚都推介嘅招牌菜！蝦乾同臘味用料豐富，每一啖都保證有飯又有臘味！飯粒煙靭乾身，吸滿蝦乾嘅鮮味同臘味嘅油香，味道豐腴滿足～入面仲加咗冬菇粒，口感更佳，食落香口。至於臘味方面，油鴨唔會太肥，膶腸甘香。
祥囍煲仔小廚
營業時間：星期一至日 17:00 - 21:30
前往途徑：港鐵筲箕灣站 A3 出口步行約5分鐘
外賣服務：有
電話：2343 8811
詳細介紹：Openrice
【九龍區】旺角、慈雲山——人氣店鋪 大排長龍
【興記菜館】
圖片來源：Beauty321
目前喺油麻地有五間分店嘅興記，係香港煲仔飯行業可以話數一數二。身爲香港老牌炭香煲仔飯店，自然需要排長龍。興記售賣嘅煲仔飯款式選擇多樣化，例如有香辣雞翼尖煲仔飯，最適合鍾意嘗試新口味嘅食客。
呢度主打以泰國香米炮製而成嘅炭香飯焦，令食客一試上癮。
小編推薦👍
臘腸滑鷄煲仔飯 $52
傳統口味嘅滑雞煲仔飯，肉質鮮嫩，一咬之下骨同肉立即分開。配埋甘香嘅臘腸，最後淋上豉油，一道香氣撲鼻嘅庶民美食攻陷味蕾。
飯焦就唔洗多講啦，又多又脆，價錢都比較親民，真係好抵食！
興記菜館
營業時間：星期一至日 18:00 - 01:00
前往途徑：油麻地站 C 出口步行約2分鐘
外賣服務：有
電話：2384 3647
更多資訊：Openrice
圖片來源：痞客邨
【四季煲仔飯】
圖片來源：Retty
呢間同樣坐落於煲仔飯盛地——廟街。四季煲仔飯距離興記煲仔飯只有幾分鐘路程，但呢度係少數會從頭到尾包辦自製煲仔飯嘅店家。
煲仔飯以傳統炭火焗煮，香味撲鼻，份量唔會太大，想自己一個去食煲仔飯都冇問題。
小編推薦👍
臘腸排骨飯 $68
雞肉同排骨鮮嫩多汁且容易入口，加上香甜濃稠嘅豉油，將煲仔飯嘅飯香提升到另一個層次。臘腸夠肥美，啱晒重口味人士。
圖片來源：Openrice
四季煲仔飯
營業時間：星期一至日 16:30 - 00:30
前往途徑：油麻地站 C 出口步行約1分鐘
外賣服務：有
電話：5989 0927
更多資訊：Openrice
圖片來源：hk01
【榮記茶餐室】
圖片來源：Openrice
開業超過廿年嘅榮記一直主打芝士菜式，近年更研發出新口味——芝士煲仔飯。有別於普通煲仔飯店，餐廳不斷嘗試開發新菜式以打出名堂。
近期更首創沙牛煲仔麵，即叫即做，成為人氣菜式，晚晚都見到門外大排長龍。招牌金蠔蝦乾煲仔飯更係全港獨有，將香港特色煲仔飯帶到新層次。
小編推薦👍
芝士煲仔飯 $83
飯面鋪上炸煙肉絲，飯底加咗粟米同洋葱，口感豐富。 餐廳用咗兩種芝士，食落口奶香濃郁，仲可以無限拉絲，超級邪惡，啱晒芝士迷。小編同朋友都要爭住食！
圖片來源：Openrice
沙爹牛肉煲仔面 $68
一上菜賣相真係好吸引，聞落仲好惹味，個肚已經忍唔住啦！煲仔面牛肉足料，厚實得嚟又唔會嚡。每條公仔麵都吸滿濃濃花生醬汁，加上大量芽菜、豆卜，口感豐富。濃稠嘅湯底有沙爹界Espresso之稱，以厚身瓦煲加熱，夠晒熱辣辣。
圖片來源：Openrice
榮記茶餐室
營業時間：星期一至六 06:30 - 21:30 星期日及公衆假期 06:30 - 17:00
外賣服務：17:00 後有供應
電話：2328 9232
更多資訊：Openrice
圖片來源：Jonathan Sin
呢間元朗小店規模較細，格局地踎，座位唔多，但一入冬就會引嚟人潮，經常排隊排到打蛇餅。
煲仔飯用炭火製作，選用泰國香米，飯粒分明乾身。選擇繁多，可以單拼亦可自由搭配。煲仔飯以外亦有小菜、串燒提供，質素都唔差！
小編推薦👍
毛家辣咸蛋肉餅煲仔飯 $62
肉餅香味濃，豬肉肥瘦均勻，加埋蒜頭、辣椒等調味，調出肉餅鮮味。煲仔飯仲可以加埋鹹蛋，啱晒重口味人士！
圖片來源：Openrice
元朗味仟食店
營業時間：星期一至日 18:00 - 23:00
外賣服務：有
電話：2449 3962
更多資訊：Openrice
【陳漢記粥面專家】
圖片來源：Openrice
大埔老字號又點少得呢度！以腸粉同埋煲仔飯最爲馳名，主打炭火煲仔飯，熱辣辣又飯香四溢。每逢秋冬時節經常都要大排長龍，係區内名店嚟架！炭火煲仔飯即點即煲，需要大家耐心等候。
而家疫情下唔想喺出面食，呢度嘅煲仔飯可以加小小錢帶埋個煲返屋企，咁就咩問題都解決晒啦！
小編推薦👍
白鱔臘腸煲仔飯 $87
好足料嘅煲仔飯，白鱔有5件，仲係厚切腩位，咬落口啖啖肉。臘腸肥美彈牙，滿滿油香滲埋入白飯，非常惹味！
陳漢記粥面專家
營業時間：星期一至日 11:00 - 04:00
外賣服務：有
前往途徑：大埔墟站 A1 出口步行約7分鐘
電話：2658 2277
更多資訊：Openrice
圖片來源：Cow Cow Store
介紹完咁多間煲仔飯名店，係咪已經迫不及待想去試返碗呢？不過以上介紹嘅人氣煲仔飯都有機會要排長龍，想去朝聖而唔想嘥時間嘅話，就要記得提前預約啦！
除咗煲仔飯，香港仲有好多特色食物，想知道就快啲去 ReUbird 睇下啦！
延伸閲讀：
【觀塘美食】精選餐廳 / Cafe｜文青靚景Cafe、惹味美食、足料抵食餐廳