×
登入 註冊

聯絡我們 關於我們
×
登入 註冊

聯絡我們 關於我們
×
 Hong Kong hk 香港 玩樂雜誌 【長洲攻略】遇見最美島嶼:10個打卡景點、住宿推介、租單車
ReUbird 活動雜誌   #拍拖好去處 #影相好去處 #親子好去處 #週末好去處 #郊遊 #沙灘 #露營
【長洲攻略】遇見最美島嶼:10個打卡景點、住宿推介、租單車

長洲除左掃街,到底仲有咩玩?長洲大把野玩呀,快啲等小編話比大家聽!


by Sky

✨Somewhere over the sky☁️🌈


出街玩想要新靈感?
全港18區好玩好食好去處推介,盡在ReUbird!

長洲可以話係香港最好玩嘅離島之一,任君遊覽海盜張保仔洞、武俠小說五行石、最美櫻花廟宇、廢棄戲院、特色小店、泳灘、租單車.....今日小編就帶大家逐一踩點啦!


A. 中環--長洲 船期表B. 10個長洲打卡景點
C. 長洲住宿推介

D. 長洲單車攻略


事不宜遲,我地睇下長洲點去先!


A. 中環--長洲 船期表


前往長洲交通:

第1步. 從中環站A出口,通過天橋,即刻到達中環碼頭

第2步. 沿著碼頭號碼次序,搵到中環五號碼頭

第3步. 乘搭船前往長洲

小編建議大家前往長洲前,睇一睇-->航班時間表,以便安排出門時間。




到左長洲之後,又有咩好玩呢?


B. 長洲玩樂、打卡好去處


係碼頭落船後,就可以開始我地嘅長洲之旅啦!長洲地圖如下:


在前往景點的途中,會路徑長洲的大興堤路,裡面有熟食市場和不少美食攤檔,想要知道長洲有咩美食,記得留意:

【長洲美食遊】15間掃街必食:超濃郁沙爹+火炙牛油果班戟+炸海鮮




長洲踩點一:張保仔洞 - 清朝海盜洞穴


長洲一日遊嘅第一站就係張保仔洞。相信唔少人都耳聞過,張保仔就係一名清朝嘅海盜,以劫富濟貧為人所樂道,傳說呢度係當時收藏寶藏嘅洞穴。據說當時佢嘅船隊有600艘船隻以及5萬人,主要劫掠官船或外國貨船。後來,清廷招安誘降張保仔,任命佢為海軍軍官。

小編提提大家:張保仔洞洞口很窄,進入洞內每步都要小心。加上洞內漆黑一片,必須帶備電筒或者用手機電筒! 

路線:

方法一:長洲碼頭落船 > 向右手行去. 經過長洲街市 > 繼續前行 > 依照指示牌的指示便到 (20分鐘路程)
(想睇路線請點擊:Google Map)

方法二:長洲碼頭落船後,就前往旁邊的公眾碼頭,搵艇家載你坐艇仔去張保仔洞,大概5分鐘就到,收費大概$5左右。



長洲踩點二:五行石 - 巨石陣內 武俠式打卡


張保仔洞附近就有我地嘅下一站——五行石,沿著小路行即可到達。「五行石」由五件巨石組成,其中一塊最巨型嘅石頭,座落係山崖邊緣,遠看似搖搖欲墜,就黎跌入海。而行入五行巨石陣當中,則有如置身武俠小說中的石陣,係長洲打卡嘅必去之處!

圖片來源:香港旅行發展局

五行石陣有唔同面向,交比大家發揮想像,創意打卡!

圖片來源:jerry.chuiii (IG)



長洲踩點三:關公忠義亭 - 古色古香 櫻花陪襯


關公忠義亭供奉關聖帝君,其神像由整塊樟木雕刻而成。呢所亭式廟宇係1973年建成,廟前香爐兩旁嘅七彩金龍係用最新嘅顏料漆上,因此色彩繽紛。此外,不得不提長洲關公忠義亭外有十幾棵櫻花,係初春嘅時候盛放,3、4月最適合黎觀賞。

長洲櫻花係香港最美嘅賞櫻勝地之一,桃紅色嘅櫻花海,配襯著古色古鄉嘅關公忠義亭,美不勝收。

圖片來源:Canon

路線:
1. 由五行石步行至忠義亭,睇路線請點擊:Google Map

2. 從長洲碼頭上岸後,沿東灣路一直走,再右轉至警署徑,然後沿斜坡走約8分鐘,睇路線請點擊:Google Map



長洲踩點四:觀音灣  - 滑浪風帆 + 唯美籃球場


長洲有兩個泳灘,一是長洲東灣,一是長洲觀音灣,兩個泳灘相鄰。而觀音灣,係香港首位奧運金牌得主、滑浪風帆好手李麗珊嘅練習場。呢度亦都樹立左一個風帆牌扁,紀念香港呢項威水史,並成為左長洲嘅打卡景點。遊客都可以租借風帆、獨木舟或其他水上滑浪設備,係長洲嘅大海上乘風破浪。


觀音灣仲有一個隱世美景,就係呢個籃球場。呢度唔單止坐享海景,佢粉藍色波地,與大海天空互相輝映, 令成個球場充滿小島風情。

識打卡個你一定唔會想錯過,同時與浩闊的大海作伴,黎一場青春嘅灌籃!


圖片來源:Orange News



長洲踩點五:東灣 - 暢泳休閒聖地


長洲東灣同碼頭十分近,因此成為旅客嘅休閒聖地。海灘有設施:更衣室、淋浴設備、洗手間等等,方便想要在長洲暢泳的旅客。東灣海灘長而窄,水清沙幼,漫步海灘睇日落最適合。不過唔講可能唔知,鄰近長洲東灣的東堤小築,早年不斷發生自殺事件,亦常常被傳出鬧鬼事件,雖然大多道聽塗說, 我們在這裡就不詳談了。

唔想落海玩,或者整污糟嘅話,行下海邊打下卡都唔錯。

泳灘旁有一間大型士多,提供沙灘傘及儲物櫃租用服務,想去泳灘暢泳、日光浴的大家,可以將貴重物品寄放置係儲物櫃。



長洲踩點六:文青小店 - 日式雜貨店


長洲除了美食多,更不能錯過一系列嘅特式小店!長洲租金較相宜,所以近年吸引左唔少年輕藝術家黎闖覓一片天空。自問係一名文青嘅大家,就有福可以黎尋覓珍寶啦!小編呢度準備左3間長洲嘅小店介紹比大家:


島中坊研工作室

島中坊研是一間以長洲為設計概念的自家製手袋飾物品牌,產品形象清新,於2013年由兩位長洲本地設計師創立。自家製既手袋飾物設計充滿簡約日本風格,有時會選用日本製既布料,製作獨一無二既布袋小包。店舖嘅主調色用純白為主,比人感覺舒服自然,十分貼合海邊小屋嘅風格。


地址: 長洲新興後街2 號地下(Google Map)

營業時間:

  • 星期一至五 12-8pm
  • 星期六日及假日 11am-8pm

電話:5480 6627

網站:島中坊研



賣藝 My Art

「賣藝 . myarts」嘅店舖位置非常顯眼,由碼頭沿東灣方向嘅路上就會見到。小店嘅外牆油上天藍色,復古神秘嘅氣息令不少遊人駐足打卡。店內大部分空間用黎售賣本地藝術者的產品,包括首飾、家品文具、畫作名信片、插畫等。另外,都會藏有店長由世界各地,搜購嘅特色創意產品,為小島帶來不少藝文色彩。



地址:長洲東灣路一號地下(Google Map)

營業時間:

  • 周一至周五10:30-18:00
  • 周六日及假期11:00-19:00

圖片來源:賣藝 Facebook



nitti-gritti

「Nitti-gritti」指必需品及細節,店內售賣嘅小物同家品黎自世界各地,全部都係店主鍾意嘅手工精品,係旅遊時搜羅番黎嘅日用品同飾物,包括地氈、德景德鎮的陶瓷國、手工木偶、法國夫婦手作嘅飾物.....想去的話要留意小店只開星期五、六、日。



地址:長洲新興後街105號地下(Google Map

電話:3689 1242

營業時間:

  • 星期五、六、日

圖片來源:nitti-gritti FB專頁



長洲踩點七:長洲愛情鎖牆Lock of Love 


這堵打卡牆並非一早就係到,而係近年長洲營運嘅B&B靈機一觸,係東灣路開設「LOCK OF LOVE」,同時發售七彩繽紛嘅塑膠許願鎖、愛心木牌,遊人可以係上面留下甜言蜜語、山盟海誓,與身邊的人留下旅行足跡,不過大家記得唔可以自己帶私家鎖去,否則會被店家會剪鎖!


地址:長洲東灣路12-14號對面(Google Map



長洲踩點八:長洲戲院 - 廢棄荒涼感戲院


長洲戲院位於新興後街120號,面積達3萬多平方呎,曾服務居民60載,至1990年代初結業,現已荒廢多年。2001年,電影《一碌蔗》仲曾經係長洲戲院取景。戲院嘅天花已經下陷,凳與凳之間亦都長滿雜草,係富有蒼涼感的拍攝好地方,不過探索時記得小心個人安全!

圖片來源:Canon

地址:長洲新興後街120號(Google Map



長洲踩點九:長洲北社海傍街 - 海鮮大餐


遊覽完長洲景點,最後當然要黎呢條海傍街。入夜後,碼頭附近的海鮮店紛紛點亮燈,店員熱情地招攬生意,覓食嘅遊人越黎越多。坐係露天嘅位置,一邊品嘗新鮮地道嘅海鮮餐,一邊可以欣賞海旁嘅漁村風景。


地址:長洲北社海傍街(Google Map



長洲踩點十:長洲北帝廟 - 太平清醮舉行地


長洲北帝廟(玉虛宮)於1783年落成,係香港一級歷史建築。廟前嘅廣場亦係每年長洲太平清醮(農曆四月八日)嘅舉行地,每年太平清醮期間,都會搭建三個掛滿平安包的包山,上演連場緊張的「搶包山」比賽。北帝廟歷史悠久,廟前闊大的石梯、廟宇頂部的七色彩龍,予人宏偉莊嚴之感。遊人仲可以係廟內一睹兩件古物——清朝的金木雕和宋朝的鐵鑄大劍嘅風采。


圖片來源:華人廟宇委員會


圖片來源:紙膠帶

地址:長洲北社海傍路(Google Map



C.長洲住宿推介


1. 西園農莊:特色露營 親子玩樂最佳


西園位於長洲西南角的西灣附近,園内十一英畝,土地劃分四個主題營區,包括觀星圓拱屋營區、蒙古包、南非營、印第安營、赤日,或者自攜營帳,亦設衆多戸外活動丶自然空間。入住露營嘅話,可以咩都唔使帶就去,夏天有冷氣唔洗驚熱,而厠所都乾淨企理,係最適合親子旅行嘅長洲住宿。


查詢網站:西園農莊

查詢電話:2981 1010/5532 1993 (Whatsapp)



2. 華威酒店:無敵海景客房 極佳位置


長洲華威酒店提供海景客房,正正在東灣的白沙灘附近,面向東灣的無敵海景,同時由於酒店座落於碼頭不遠處,非常方便住客在長洲的大街小巷吃喝玩樂。館內設有 2 處餐飲場所和季節性開放的室外游泳池客房設有落地窗、私人衛浴、電視、冰箱和私人保險箱。部分客房設有私人陽台。



查詢網站:香港長洲華威酒店 - 官方網站

查詢電話:2981 0976



D. 長洲踩單車


1. 長洲單車路線


長洲不同於其他嘅單車路線,係長洲踩單車,可以任性隨意,不必有固定嘅單車路線,穿梭於大街小巷,沿路品嚐地道小食。不過,如果大家想要一條平坦嘅大道可以盡情踩單車,可以考慮係近海邊嘅大興堤路、長洲西堤道,一邊欣賞海景,一邊迎風踩單車。

圖片來源:Holimood


2. 長洲租單車

長洲租單車嘅地方太多啦,係主要嘅幾條街都搵到,包括北社海傍街、長洲街市附近都可以搵到!

小編呢度提供幾間唔同位置嘅租單車店家,供大家參考:


- 何恩記單車 (近北社)

地址: 長洲北社四里(Google Map


- 蕭記單車 (近街市)

地址:長洲長洲家樂徑 (Google Map)


以下條片比大家參考,片中嘅主角都係係長洲街市一帶租單車,然後沿著海傍踩單車:


長洲原來唔只掃街咁簡單!仲有張保仔洞、五行石、廟宇、文青小店....無數個打卡位,你點可以錯過?


相關文章:

1. 【長洲美食遊】15間掃街必食:超濃郁沙爹+火炙牛油果班戟+炸海鮮

2. 【鹿頸谷埔】0難度行山攻略|山水如畫、客家老圍、蘆葦花田

3. 【迪欣湖】欣澳休閒好去處:樹蔭下野餐、單車環遊人工湖



熱門文章




關鍵詞:
香港 【長洲攻略】遇見最美島嶼:10個打卡景點、住宿推介、租單車  香港   香港   香港