講到行山，相信大家對難度低、易行、又適合新手的龍脊並唔陌生。因為山勢高低起伏，好似沉睡嘅巨龍而得名嘅龍脊其實並唔難行，加上春天秋天係適合行山嘅季節，所以今日就同大家介紹下龍脊啦！
龍脊位置
被稱為「最佳市區遠足徑」的龍脊位於香港島石澳，屬於港島徑第八段，周圍都係海，風景一流。龍脊行山路線總長為9.5公里，需時大概三小時，中途冇補給站，大家記得預留返充足時間同埋乾糧先好出發！ 而前往龍脊嘅方式有好多種，小編就集中同大家介紹下由土地灣出發上龍脊嘅路線啦！
龍脊交通及路線
前往龍脊其實好簡單，到達筲箕灣後，大家可以由地鐵A2出口出去，然後於巴士總站乘搭9號巴士於土地灣落車；或者搭紅色小巴都可以，一樣都係在土地灣落車。
於土地灣站落車後，就會見到前往龍脊嘅路牌，大家跟住指示牌行就係龍脊行山徑啦！不過呢度小編要提提大家，龍脊一開始嘅一兩公里係冇樹蔭遮擋，同埋係爬坡嘅路段，中途冇退出嘅路線，所以大家記得做好防曬措施同帶備足夠食水，有需要嘅話可以帶埋行山杖呀～
沿路行上去，就去到龍脊嘅最高點打爛埕頂山啦！呢度海拔284米，兩邊都冇高樓大廈遮住，大家可以盡情飽覽美景。而隔離就係龍脊觀景台，仲有埋一張長凳比人坐添！行咗一大段山路都應該有小小攰，呢個時候就可以坐住欣賞美景，亦都可以趁機影相留念。不過欣賞美景嘅同時，要留意身邊有冇其他行山者，記得唔好影響他人～
睇完美景，就要離開龍脊觀景台啦！落山途中，沿路都係森林山路，景觀唔多，但勝在有樹蔭，十分陰涼，唔需要擔心再被暴曬。
行行下，就會見到前方有路牌，一邊向石澳道，一邊向大潭峽。如果已經攰想翻屋企休息，就可以向石澳道方向行，搭9號巴士返筲箕灣；而如果想繼續行，就可以向大潭峽方向出發前往大浪灣。
沿路會有好多凹凸不平嘅小路，同埋都會見到隔離嘅流水，路途陰涼且輕鬆。
落到山，穿過一堆小屋到達大浪灣停車場，繼續直走，便到達大浪灣啦！成個龍脊路段完成！
回程方面，可在大浪灣村村口乘搭9號巴士返回市中心。
路線：土地灣 -->打爛埕頂山 -->龍脊馬塘坳 -->大浪灣龍脊
唔知大家睇完龍脊介紹，有冇約定friends， plan定週末去行山呢！記得記得要做足準備先行龍脊呀～
你可能感興趣的文章：
【行山好去處】賞芒新手路線、千島湖等世外桃源推介，讓你戀上山愛上水