相信每對新人都希望自己嘅婚禮係完美、浪漫又獨一無二嘅，而「婚禮音樂」就係其中一個營造完美婚禮氣氛嘅重要元素啦！唔好以為婚禮歌曲亂咁揀就得，其實入面都大有學問㗎！無論係新人入場、敬酒，或是大合照，氣氛都唔同，所揀嘅婚禮歌曲自然都會有所不同。想知更多？即刻睇文啦！
一、迎賓入席
賓客初初入到婚宴場地，可以揀一啲甜蜜、可愛、輕快、浪漫嘅婚禮歌曲，唔單止可以令佢地快速感受到婚宴甜蜜又喜悅嘅氣氛，仲可以幫助賓客準備好愉悅嘅心情見證一陣間嘅喜宴。
推薦婚禮歌曲：
I’m Yours – Jason Mraz
正如歌名一樣，我嘅心，一早屬於你，無需再等待，無需再猶豫。歌詞浪漫之餘曲風亦好輕快，適合做開席前嘅婚禮歌曲！
Thinking Out Loud – Ed Sheeran
曲風輕快、歌詞「直至70歲，也一樣如23歲的愛你」亦十分浪漫，可以表現出新人們嘅格調同愛情故事。
二、新人入場
新人入場嘅環節，唔單止係呈現新娘最靚嘅時刻，亦係雙方交付彼此幸福、家長見證仔女成家嘅moment，適合揀一啲隆重、溫馨、具有紀念性意義嘅婚禮歌曲。
推薦婚禮歌曲：
明日晴れるかな - 桑田佳祐
作為前大紅日劇《求婚大作戰》嘅主題曲，歌手桑田佳佑嘅嗓音，渾厚而穩重，令人聽起來特別有感覺。
最重要的決定 - 范瑋琪
正如歌詞「你是我最重要的決定，我願意每天在你身邊甦醒，就連吵架也很過癮 不會冷冰，因為真愛沒有輸贏 只有親密」咁，曲風溫馨，歌詞亦具有紀念意義，適合新人入場時播～
Marry me - 蕭敬騰
歌曲本身就非常令人感動，歌詞寫著新郎確定新娘係佢嘅真愛，會用一生好好照顧對方嘅心意，婚宴時播出絕對會令賓客們非常沉醉。
三、用餐、敬酒歌曲
見證完婚禮，就到咗較為輕鬆嘅用餐同敬酒環節。呢個環節通常都係賓客同新人們交流感情、聊天寒暄嘅時刻，故可以揀較為輕鬆、優雅嘅歌曲。
推薦婚禮歌曲：
Perfect - Ed Sheeran
Ed Sheeran可謂婚禮歌曲之王，連英國皇室哈利王子結婚果陣都揀咗呢首歌！真摯動人嘅歌詞歌詞，象徵搵到最完美嘅另一半，呢首與天后Beyoncé合唱嘅版本亦好適合新人一齊對唱。
Photograph - Ed Sheeran
歌詞唱著愛情當中雖然會疼痛，但愛卻能夠治癒一切傷痛，療癒兩人嘅靈魂。歌詞感動又浪漫，氣氛輕快又輕鬆，賓客用餐時播就最適合不過啦！
A Thousand Years - Christina Perri
呢首《A Thousand Years》同樣都係婚禮上唔少新娘鍾意播嘅感人情歌，說明對方給予自己勇氣，以及與歌名一樣地一定會愛著對方一千年～
四、合照送客
食完嘢，點都要同新人影下相留戀。呢個時候就可以播返較為活潑、歡樂嘅歌，令大家心情愉悅。
推薦婚禮歌曲：
Me & U - 鄧福如
帶有強烈節奏感嘅甜蜜歌曲，氣氛活潑且歡樂，適合合照送客時播，令賓客可以帶著愉快嘅心情離開婚宴。
Marry You - Bruno Mars
自從紅爆亞洲《來自星星的你》入面嘅女主角全智賢向男主角都教授求婚時唱咗這首歌，呢首歌瞬間成為經典中嘅經典，旋律亦係甜蜜歡樂至極，令人忍唔住跟住一齊跳舞！
結婚一生人一次，點都要揀返幾首歌令自己個婚禮靚靚仔仔啦！唔知大家睇完以上嘅婚禮歌曲推薦，又搵唔搵到合心水嘅歌曲呢？
你可能會感興趣：