通脹就年年有，人情價位不免都會隨著通脹上升。每次收到「紅色炸彈」，通常都會問：「人情畀幾多好…」如果咁啱果日出席唔到又要唔要畀人情呢？同時，人情分等級制，親疏遠近的關係、宴會場所都會影響到價位，令人難以捉摸要比幾多人情。所以今日小編就為大家整理咗2021年人情公價，即刻睇文啦！
人情多定少？睇宴會場地同關係先
擺酒係唔少新人婚禮入面不可缺少嘅一環，亦都係支出最大嘅一部份，平均都要花上十幾萬。而作為賓客，又要比幾多人情呢？2020年嘅基本人情價就係$600，而人情係與宴會場地息息相關，如果係高級酒店，便要上千；若係普通午宴，人情便是幾百蚊。咁收到喜帖嘅朋友，當然唔可以只係比最低價$600啦！而係要留意返與新人之間嘅關係啦！如果係親戚或者係特別熟絡嘅朋友，正路就要加碼；如果唔係特別熟，便可以以公價比人情～
人情公價一覽
1.酒店婚宴人情公價
在酒店擺酒，成本都唔低，所以人情自然都會高小小。而酒店亦有分普通酒店同高級酒店，高級酒店如半島酒店、四季酒店，擺酒成本相對高昂，故人情公價相對較高。
高級酒店：$1400
一般酒店：$1000
2. 酒樓婚宴人情公價
於酒樓舉辦婚宴嘅成本一般較酒店平，人情公價亦相對較低。一般黎講，無論係高級酒樓定係普通酒樓，人情公價為$800。
3. 會所式婚宴
會所係呢幾年新興嘅婚宴場地，通常與證婚同時舉行，但人情價都唔平，可以話同酒店嘅人情不相伯仲。
婚宴會所 $600-$800
高級會所 $800-$1,000
4. 午宴
近幾年唔少新人崇尚一切從簡，以午宴代替晚宴。無論係中式或西式嘅午宴飯局，人情指標與酒樓差唔多，都係$800。
5.Cocktail party
相對Casual嘅Cocktail party﹙雞尾酒會﹚，人情公價相對較低，約$600。
其他注意事項
1.出席唔到婚禮洗唔洗比人情？
一般而言，如果出席唔到婚禮，並無一個明確嘅人情公價，而洗唔洗送、送幾多人情就要視乎返囍帖上是否有派餅卡、以及你與新人之間嘅關係。
如果你與新人相識十多年感情深厚、或者係佢地嘅長輩，在新人大日子送上人情以表祝福係理所當然，至於金額則可自行決定，公價就大約$500起，一切在乎心意；但如果你與新人關係疏離，不送人情亦不為過。
另一方面，如果咁啱碰上白事不能出席，傳統上「紅白相撞」，一般唔會付予人情，相信新人都會明白。
2.做兄弟姐妹洗唔洗比人情？
做姊妹或伴娘絕雖然要服侍新娘，但大部份都有得分開門利是，人情方面便可按心意準備或者買禮物比新娘子，畢竟結婚一生人一次，好姊妹有今生無來世，計較唔到太多。做兄弟與伴郎當然九成九都是「捱義氣俾姊妹玩」，但都需要準備人情，價錢都可按上文分級而定。當然，「識做」嘅新郎哥，見到兄弟咁辛苦幫手，都會回封利是比兄弟嘅～
3.人情金額要吉利
話曬結婚係一個開心又喜慶嘅日子，所以人情金額都要吉利、好意頭。人情必定要為雙數，象徵好事成雙，也有吉祥之意。同時，應避開4及9字，因「4」代表「死」、「9」代表「苦」，有不祥之意。
4.勿用普通利是封當人情封
可能有人會覺得用返新年剩餘嘅普通利是封當人情封可以慳番幾蚊。雖然兩者都紅噹噹，但其實大有不同。首先，人情封一般size 較大，五百元鈔毋須摺疊便可放進封內；另外，人情封上有「XX奉賀」、「XX之喜」、「XX鞠躬」及「XX笑納」禮封格式資料需填寫，普通利是封唔會有。所以，幾蚊人情封絕不可慳！
5. 銀行現金禮券得體又穩陣
不少賓客都會選擇用銀行禮券比人情，形式同支票一樣，可以直接兌換成現金。銀行亦會提供賀卡帖封，包裝上較為得體。當所比嘅人情價並非「完整尾數」，例如$1,688呢D「好意頭尾數」，建議就用銀行禮劵。
當然，以上人情公價只供參考，其實比人情嘅原意都係賓客對新人嘅一份心意和祝福，大家可以根據情況調節金額，莫需太計較及市儈～