一場婚禮象徵著一生承諾，意義非凡之餘，開支更係數以萬計。除咗酒席、婚紗攝影等「大數」，仲有好多瑣碎嘅小數目要計，一個唔小心就可能令到婚禮超支。不過大有大搞，細都有細搞，今日小編就整理咗各項婚禮主要開支，俾各位準新人們可以做定結婚開支預算喇！
文章將會分成3部分：
| 1. 婚前開支 |
| 2. Big Day開支 |
| 3. 婚後開支 |
婚前開支
1. 婚妙相 (預算：＄22,000-$50,000）
婚前最重要嘅梗係要影輯婚紗相，當中嘅花費亦當然豐儉由人。如果想到海外取景，就要額外再考慮攝影師、化妝師、機票、住宿、婚紗禮服租借等項目。坊間亦有唔少海外攝影套餐，但幫襯時，記得留意返當中有冇某啲服務唔包在內，以避免出發後先發現有額外支出。
圖片來自 girltalkhk
2. 喜帖（預算：$1,000-2,000）
如果對喜帖設計要求冇太大執著，便可購買坊間已經印好咗嘅喜帖，價錢通常較平。而唔少禮宴套餐都會包一定數量嘅印刷品，如果budget有限，可直接使用。但如果想要有特別設計同個人特色嘅喜帖，就需另請設計師處理。當中所用到嘅特別紙質、效果，亦都要逐一收費，價錢會相對較高。如果新人唔係親手派出喜帖嘅話，都要計埋郵費入去。
3. 過大禮（預算： $50,000-$70,000）
中式婚禮，點都唔可以少咗過大禮呢個環節。除咗要預備禮籃、果籃、海味、禮物等大禮，禮金都係一個大開支。根據調查，2021年嘅禮金中位數上升至$50,000，所以各位準新人如果要籌辦中式婚禮嘅話記得要預留多啲budget喺過大禮上面喇！
圖片來自 Artfia
4. 婚前身體檢查 （預算： $1,500 -$5,000）
除咗預備各樣婚禮細節，婚期身體檢查都好重要！了解自己以及伴侶嘅身體狀況，唔單止係對大家嘅保障，更加係為下一代負責任嘅表現。而費用方面就視乎檢查項目而異，有平亦有貴。
圖片來自 nownews
Big Day開支
1. 婚宴酒席 （預算：$ 150,000-$250,000）
婚宴酒席都係其中一項「大數」，而根據調查，新人投放最多預算嘅就係喺酒席上，平均每對新人會擺20圍，花費18萬。如果唔想花費太多預算喺酒席上，雞尾酒派對或者午間婚宴都係唔錯嘅選擇。
圖片來自 videoticz fiji
2. 婚禮服飾、化妝及戒指 （預算：$90,000-$120,000）
Big Day當日要靚，髮型師同化妝師當然唔少得，加上結婚當日唔同嘅服裝、首飾、戒指，以及姐妹團嘅服裝及妝容，閒閒哋都要洗幾萬元。預算少嘅，都可以試下租借服裝，同埋上網上時裝購物平台淘下啲姐妹裙～
圖片來自 videoticz fiji
3. 婚影 （預算：$12,000-$18,000)
結婚一生人一次，當日嘅精彩梗係要拍低之後重溫，所以攝影團隊點都唔少得。攝影團隊由朝跟到晚，工作一啲都唔簡單，預算亦都要一萬或以上。
圖片來自 videoticz fiji
4. 註冊及證婚 （預算：$1,000-$7,000）
結婚之際，有大量事務需要處理，而當中最重要嘅程序就係「申請註冊」。到「婚姻登記處」辦理手續會較平，大約千幾蚊就得；但如果想方便啲，都可以請律師到場證婚，價錢大約由兩千去到七千蚊不等，視乎所請律師嘅名氣。
圖片來自 videoticz fiji
5. 其他開支（預算：$10, 000）
除咗以上嘅結婚開支，結婚當日都仲有好多瑣碎嘢要處理，例如派利是、包車到各處地方接送親友等等。所以記得預鬆小小開支呀！
婚後開支
1. 蜜月旅行 （預算：$40,000-$80,000）
咁辛苦籌備完婚禮，新人們梗係要去個蜜月旅行輕鬆返。話曬係度蜜月，梗係想住好啲食好啲，所以幾萬預算必不可少。如果係去歐遊，開支便更高。
圖片來自 videoticz fiji
婚禮平有平搞，貴都有貴搞，最重要都係大家開開心心。唔知大家睇完呢篇婚禮開支預算後，又會籌辦一個點樣嘅婚禮呢？
其他婚禮相關文章，可瀏覽這裡：
【婚紗禮服租借】精選15間婚紗店｜為你找到浪漫迷人的專屬款式
【結婚回禮】多款睇得又實用回禮小禮物推介 讓賓客留下深刻印象