【結婚回禮】多款睇得又實用回禮小禮物推介 讓賓客留下深刻印象

中國人崇尚「禮尚往來」，因新人收咗親朋好友「人情」，所以喺婚禮當日都要送一件「回禮小禮物」以表謝意。而回禮小禮物有好多種，有實用類亦都有食物類，當中每樣都有其優劣。咁究竟回禮小禮物送咩好呢？今日小編就整理咗三大類別嘅回禮小禮物，希望可以幫到煩惱緊嘅新人啦！

一、食品類

1. 糖果

新人結婚就甜甜蜜蜜，以糖果作為回禮就夠曬sweet啦！如果唔想喺回禮禮物方面花太多心機嘅懶人們，便可以直接以糖果回禮，夠曬簡單！

圖片來自： weddinginvitespaper

2. 客制化小食（曲奇餅、馬卡龍)

除咗糖果，唔少小食，例如曲奇餅同馬卡龍，都係比較受歡迎嘅回禮小禮物。如果想特別啲，新人們仲可以將賓客嘅名印喺曲奇餅/馬卡龍上，令佢地可以將新人甜絲絲嘅心意帶返屋企細心品嚐。

圖片來自：新娘物語

3. 花茶包

香港有唔少主打婚禮茶包嘅品牌，主打各式花草茶，例如清肝明目嘅桂花雪梨茶、美顏嘅蘋果茶等等。精緻嘅茶包通常係獨立包裝，而唔少茶包嘅包裝都十分之靚，十分適合作為回禮小禮物。

圖片來自：一品茗心

食品類回禮禮物之優劣：即食即棄夠曬方便，唔洗賓客煩惱如何處置！

二、實用類

1. 潤唇膏

冬天結婚嘅新人，都可以選擇喺寒冷又乾燥嘅冬天為賓客送上潤唇膏。呢份回禮禮物唔單令賓客感到新人嘅貼心，仲十分實用，老少咸宜。

圖片來自：新婚生活易

2. 杯墊

杯墊都係一個實用嘅回禮禮物，不過小編就唔太建議喺上面印上新人嘅名啦，畢竟會令宴會中冇咁熟嘅賓客用起來覺得尷尬。簡簡單單印上婚宴日期，配上簡單嘅圖案都可以好perfect！

圖片來自：Pinkoi

3. 筷子

一對筷子，意味「成雙成對」，簡單又實用！

圖片來自：buy.line.me

實用類回禮小禮物之優劣：實用類禮物相信係唔少新人嘅首選，貪佢夠曬實用。不過可能賓客家中已經收到過唔少呢類回禮小禮物。

三、潮物類

1. 多肉植物小盆栽

唔少人都會喺屋企或辦公室擺放一盆多肉植物，增加生氣。而呢種可愛嘅小盆栽亦漸漸亦變成回禮常用禮物。具有生氣嘅植物，與結婚嘅喜悅十分配襯。

圖片來自：Cosmopolitan.com.hk

2. 開瓶器

開瓶器對於常飲酒常參與社交活動嘅人來講係必需品。而隨身攜帶一個開瓶器，一有朋友約你chill一chill，便可以大派用場。新人們可訂製一批個人化嘅開瓶器，並親自設計圖案，製作一個獨一無二嘅回禮禮物。

圖片來自：weddingbloom

3. 浪漫環保袋

近年環保風氣盛行，出街自備環保袋已成趨勢。新人亦都可考慮以浪漫環保袋作為回禮禮物，喺上面印上兩人嘅logo及圖案，提倡環保之餘仲可以令賓客記得新人，一舉兩得～

圖片來自：pixnet.net

潮物類回禮小禮物之優劣：呢類禮物唔單止實用，又夠曬新潮，相信會備受年輕人喜愛。但缺點就係成本較高，加上物品本身可能冇背後含義，可能需要重新包裝賦予佢哋某啲意義啦～

唔好以為求其搵啲小禮物擺喺婚宴桌上就完成咗「回禮」呀！如果唔小心揀咗不恰當嘅回禮禮物，唔單止會成為親友間嘅笑柄，仲會令大家懷疑準新人嘅品味。希望各位新人喺睇完以上嘅回禮小禮物推介後，都諗到婚禮當日用咩禮物作回禮啦～

想睇更多婚禮相關嘅資訊，請click以下嘅內容：

【喜帖寫法】結婚喜帖格式內容 教你撰寫完美囍帖

【人情公價2021】結婚人情利是 酒店婚宴/ 酒樓婚宴人情價位人情參考

【求婚場地】娶得美人歸 | 浪漫求婚地點你要知