平時口若懸河嘅人，喺一生人一次嘅求婚過程中，難免都會因為太緊張而突然口啞啞。話晒求婚都係人生大事之一，如果想令到雙方都留低美好回憶嘅，就要學定幾段求婚台詞，等另一半毫不猶豫哋 say YES 喇！
一、 準備求婚台詞要注意啲咩？
有網絡調查提到，超過70%嘅已婚女性仲記得當初另一半求婚時嘅台詞同地點；而當中唔記得嘅女性，多數係因為求婚台詞過於冗長。由此可見，求婚台詞過於長篇大論都未必係一件好事㗎！所以小編建議大家，喺挑選句子時，可以盡量揀少少精簡又易記嘅，等另一半結完婚幾十年之後都仲記得呀嘛！另外，求婚地點亦好重要，一個浪漫嘅場地更容易令另一半印象深刻，所以記得花多啲時間好好規劃下啦！
圖片來自 求婚職人
二、 點樣揀求婚地點？
呢個就要參考返【求婚場地】娶得美人歸 | 浪漫求婚地點你要知 ，當中有唔少求婚地點畀大家參考㗎！
圖片來自 非常婚禮
三、求婚台詞方向及範例
相信大家睇得呢篇文，都係想參考下點準備求婚台詞。小編準備咗以下幾個方向，即刻睇下幫唔幫到大家啦！
1. 回想下雙方初次見面到正式拍拖嘅時刻
2. 對方如何令你進步/變得更好
3. 幾時發現想同對方共度餘生、原因又係咩？
4. 如果生命中無咗對方，你又會點？
5. 話畀對方知道你有幾愛佢
範例:
今日係我哋一齊嘅第 XXX 日，時間真係過得好快。多謝你呢幾年一直默默哋喺我身邊陪著我、支持我。往後嘅日子，我想每日起身見到嘅第一個就係你，每晚訓覺合埋眼見到嘅最後一個都係你，兩個人一齊生活、探索未知嘅未來、再慢慢變老。嫁畀我，好嗎？
圖片來自 DiamondHedge
四、點樣準備求婚儀式？
諗好咗求婚台詞之後，最後一步就係練習喇！平時幾有自信嘅人，遇上求婚呢個咁隆重嘅儀式，點都可能會有少少緊張。所以小編建議即將求婚嘅你可以嘗試練習多幾次。首先，準備一張比較靚嘅卡片仔，將求婚時想講嘅說話全部寫上去；之後，嘗試對住鏡進行模擬練習，同時要注意面部表情、身體姿勢。如果都係無把握嘅，可以試下叫朋友扮演女朋友角色，進行模擬求婚。如果能夠成功記得求婚台詞，咁當然係好事啦！但如果驚自己到時緊張到頭腦一片空白，不妨試下求婚時照著事前準備嘅卡片仔朗讀出嚟啦！
圖片來自 DiamondHedge
文中嘅範例未必適合每個人，所以建議大家準備求婚台詞時，可以朝著小編列出嘅五個方諗諗，創立出屬於兩個人專有嘅求婚台詞。最後，祝福大家睇完呢篇求婚台詞嘅文章，都可以成功求婚！
你可能會有興趣嘅文章：