俗語有云：「秋風起，蟹腳肥」。每年秋天都係食大閘蟹嘅季節，除咗可以品嚐到金黃色蟹膏，肥美鮮甜嘅蟹肉，大家又知唔知道食大閘蟹嘅注意事項呢？小編就為大家整合咗揀蟹小貼士、大閘蟹最佳煮法、同飲食禁忌，等大家有「蟹」好食！
1. 點解秋天先係大閘蟹季節？其他月份又有無大閘蟹食呢？
其實其他月份都有大閘蟹㗎，不過如果想食到最肥美嘅大閘蟹，就要趁秋天喇～ 因為大閘蟹屬於冬眠生物，喺冬天來臨前，佢哋要儲肥自己，所以到秋天，大閘蟹已經食飽，蟹膏蟹肉自然較其他季節多。
圖片來源 Sohu
2. 大閘蟹產地
講起大閘蟹，大家通常會聯想到來自江蘇陽澄湖嘅大閘蟹，但其實只要供應地湖水潔淨，無落農藥，經檢驗合格，已經可以有高品質嘅大閘蟹喇！加上近年陽澄湖蟹供不應求，大多已不作出口，所以大部份喺香港聲稱係「陽澄湖大閘蟹」都未必係真貨，可能來自太湖或其他蟹場。想試下美味嘅大閘蟹，中國東北三省（遼寧、吉林、黑龍江）嘅品種同樣值得入手。
圖片來源 Straitstimes
3. 如何揀出新鮮嘅大閘蟹？
一般門市出售嘅大閘蟹都被水草捆綁，大家並唔容易用肉眼判斷新鮮度。呢個時候，可以試下輕觸蟹殼近眼嘅位置，如果大閘蟹「眼仔碌碌」轉動眼球、或縮一縮眼睛，即代表生猛、新鮮！另外，記得留意大閘蟹嘅肚必須為白色，代表佢所生長嘅湖水夠乾淨；綠黑色嘅蟹身顏色要夠深，腳上嘅蟹毛要帶金紅色。做齊以上幾樣嘢，大家仲可以試下用手按下蟹腳，愈厚實愈靚。
圖片來自 養生科普網
4. 雄蟹與雌蟹嘅分別
你又知唔知，食大閘蟹都要「睇schedule」㗎！古語有云「九月圓臍十月尖」，意思係農曆九月適合食蟹乸、農曆十月適合食蟹公。因為蟹乸比蟹公早熟，蟹膏會較早豐富濃郁起來。而「圓」同「尖」指嘅就係大閘蟹嘅腹部：蟹乸嘅腹部較圓，蟹公嘅腹部較尖。
圖片來自 Yahoo
5. 洗蟹嘅正確方法
一般來自水質上乘湖區嘅大閘蟹，清洗時可以唔需要解開綑綁蟹身嘅水草。不過都要提提大家，部分大閘蟹長期處於湖底，容易藏有泥垢細菌，必要時可解開水草，以牙刷徹底刷淨污物，但都要小心避免被蟹爪整傷。
圖片來自 ELLE
6. 大閘蟹煮法
蒸煮大閘蟹嘅時間不宜過長，以體形來講，5 ～ 6両嘅大閘蟹蒸大約16 ～ 20分鐘就得，而7 ～ 9両嘅可以蒸大約20 ～ 25分鐘。蒸嘅時候可以將大閘蟹反轉放喺蒸碟上，肚身朝天，等啲蟹膏或鮮蟹汁可以「兜」喺蟹殼上面。同時，購買大閘蟹時通常會附送薑同紫蘇葉，佢哋嘅作用就係幫助中和大閘蟹嘅「寒」，所以可以將兩者放入熱水中滾熟，等啲精華透過蒸汽發揮到大閘蟹入面。最後，等蟹殼變成紅色、蟹肉變成白色，就差唔多可以食用喇！
圖片來自 大閘蟹
7. 食大閘蟹禁忌
相信大家都聽過大閘蟹唔可以同柿一同食用，點解呢？因為杮含有豐富嘅單寧酸（Tannings），而大閘蟹含有豐富蛋白質，當兩者結合，就容易結塊成「鞣酸蛋白」，造成令人難以消化，導致胃痛、肚痾等腸胃不適消化不良嘅症狀。除咗杮，其他含有單寧酸（Tannings）嘅食物，例如紅酒白酒、茶葉、番石榴、山楂等，亦應該避免同大閘蟹同時食用。如果忍唔到口，都起碼要隔 2 小時再進食。
圖片來自 元氣網
8. 大閘蟹含高膽固醇
根據食安中心資料，每100克嘅大閘蟹含約267毫克膽固醇，雖然世衛喺 2016 年撤銷咗攝取膽固醇嘅上限，但為咗健康著想，都係提提大家：一般成年人嘅建議每日攝取膽固醇上限係300毫克。如果係三高人士、膽固醇過高人士、長期病患者等，以一般約重約3～4両（約150～200克）嘅大閘蟹為例，食1隻已經超出建議上限。所以建議大家食蟹嘅時候都要注意份量，咁先可以食得開心又健康！
圖片來自 Sohu
相信大家睇完呢篇文大閘蟹食法，對大閘蟹季節、大閘蟹食法、大閘蟹蒸幾耐都有一定嘅認識。如果想了解更多關於大閘蟹嘅資訊，以下段片可能幫到你喔~
2024 大閘蟹推介
迫不及待想買靚大閘蟹返屋企歎，但唔知買邊間好？小編幫大家整理咗最新推介文章，有興趣嘅可以睇睇喔：
