無論你有冇行過山，相信都有聽過麥理浩徑呢四個字啦！作為香港首個長途遠足徑，麥理浩徑全長約100公里，共分為十段。路線由東部嘅西貢起，至西部嘅屯門，途中穿越八個郊野公園，十分之長。今日就同大家介紹下呢十段唔同嘅麥理浩徑啦～
【麥徑一段：細看萬宜水庫】
相信就算大家冇聽過萬宜水庫，應該都有喺社交媒體上見到人地打卡嘅照片！而要到達萬宜水庫，就要經麥理浩徑第一段。麥理浩徑第一段嘅起點喺北潭路同大網仔路嘅交匯處，跟住果度提供嘅地圖資料牌行，便會抵達壯觀嘅萬宜水庫啦！打完卡之後再行去浪茄沙灘，就完成了麥理浩徑第一段啦！
路線：北潭路 › 萬宜凹 › 萬宜西壩 › 萬宜東壩 › 浪茄
長度：約 10.6公里
需時：約3小時
難度：3/5
起點交通：於西貢搭7號小巴或者94號巴士，於上窰站落車；或於鑽石山港鐵站乘搭巴士 96R (假日)，一樣於上窰站落車
終點交通：於萬宜水庫東壩乘搭的士返回西貢市，車費約$120，需時約30分鐘
【麥徑二段：感受海灘與高山之美】
比起麥徑一段，麥理浩徑第二段雖然較為艱辛，但個賣點就係可以觀賞唔同海景！由浪茄灣起至香港最優美嘅海灘大浪灣，係呢段路程中最為精華嘅迎海路段，實在唔可以錯過。
路線：浪茄 › 西灣山 › 吹筒坳 › 西灣 › 鹹田灣 › 大浪坳 › 赤徑 › 北潭凹
長度：約 13.5公里
需時：約4.5小時
難度：3/5
起點交通：
- 搭新界的士到萬宜東壩涼亭，車費約$120，需時約30分鐘，之後再行約20分鐘左右到達第二段起點
- 於西貢麥記門口乘搭29R私人村巴到西灣亭出發，可以直接略過浪茄及西灣山嘅路段，路段較為輕鬆，約10公里
終點交通：於北潭凹搭巴士 94 號、巴士96R（假日）、巴士 289R 號 （假日），或者小巴7號返回市區
|
喜歡呢篇文章嗎？
歡迎你 Follow 我哋 Instagram 或者 Like 我哋 Facebook Page，收到我哋最新發放嘅資訊！
無論係朋友家庭聚會、拍拖、Party、公司活動、慶祝節日或婚禮， ReUbird 都幫你輕鬆計劃每個活動。
|
【麥徑三段：穿越數個高山】
如果想睇靚景之餘又想挑戰高難度，就要試下麥理浩徑第三段啦！過程當中需要一口氣攀過四個海拔約400米嘅山峰，包括：岩頭山、畫眉山、雷打石山和雞公山，所以一定要有充足體力先做到。相信大家只要做足準備便可挑戰成功，途中仲可眺望塔門、蚺蛇尖、馬鞍山等景色，風景一流。
路線：北潭凹 › 牛耳石山 › 嶂上 › 畫眉山 › 雞公山 › 水浪窩
長度：約 10.2公里
需時：約3.5小時
難度：3/5
起點交通：於西貢搭7號小巴或者94號巴士，於北潭凹站落車；或於鑽石山港鐵站乘搭巴士 96R (假日)，一樣於北潭凹站落車
終點交通：於水浪窩搭 99 號或299X巴士返回市區
【麥徑四段：挑戰高難度】
如果行山經驗豐富，又鍾意挑戰高難度嘅話，就要試下麥理浩徑當中最難行嘅第四段啦！呢段跨過馬鞍山郊野公園，穿過黃竹洋村，唔單止可以睇到高山之美，仲可以感受到一片綠色嘅平原之浪漫。而由於美景甚佳，當然要付出時間，完成整個路程大約需要5小時，行山前要預留充足時間。
路線：水浪窩 › 馬鞍山 › 昂平 › 茅坪 › 黃牛山 › 大老山
長度：約 12.5公里
需時：約5小時
難度：4.5/5
起點交通：巴士 299X 號或者巴士 99 號，於水浪窩落車
終點交通：於終點飛鵝山道乘的士離開，又或沿飛鵝山道下走至新清水灣道離開
【麥徑五段：飽覽九龍市區美景】
麥理浩徑第五段係最近市區嘅一段，比大部分段落嘅海拔為低。由基維爾營地開始，攀越大老山嘅山脊至沙田坳，再繞過獅子山嘅山腰，經筆架山及鷹巢山自然教育徑至大埔公路。雖然難度較低，但前往起點非常不便，需要乘坐的士於基維爾營地下車，然後行過去起點。
路線：大老山 › 沙田坳 › 獅子山 › 筆架山 › 大埔公路
長度：約 11公里
需時：約3.5小時
難度：2.5/5
起點交通：
- 由清水灣道接飛鵝山道走至起點
- 乘搭的士至近基維爾營地下車
終點交通：於大埔公路乘搭巴士 72 號、巴士 81 號返回
|
喜歡呢篇文章嗎？ 歡迎你 Follow 我哋 Instagram 或者 Like 我哋 Facebook Page，收到我哋最新發放嘅玩樂情報！ 一到週末或者放假，就想喺香港周圍玩周圍食？無論係同屋企人定朋友出街玩，定係同另一半拍拖，ReUbird 都幫你輕鬆計劃好每個活動 👫 繼續探索香港： |
【麥徑六段：低難度路徑 新手無難度】
第六段係麥理浩徑路程最短、最易行嘅一段，因此頗受行山初哥歡迎。由大埔公路出發，經九龍水塘至城門水塘。成段路程中唔單止可以欣賞到城門水塘嘅美景、同埋陳立於水壩附近嘅歷史遺跡，仲可以見到活潑嘅獼猴，非常熱鬧。不過就要小心收埋啲食物，唔好俾佢地搶走呀！
路線：大埔公路 › 九龍水塘 › 金山 › 城門水塘
長度：約4公里
需時：約1.5小時
難度：1.5/5
起點交通：乘搭巴士 72 號、巴士 81號於大埔公路落車
終點交通：須沿城門道左走至小巴站乘搭往荃灣之小巴離開
【麥徑七段：越過針山與草山】
麥理浩徑第七段嘅賣點就係可以同時穿越兩座山啦。行山者先後跨越針山及草山，路線嘅上落幅度大。草山嘅路段以水泥及泥徑為主，斜度及難度較高；而草山則係以馬路為主，坡度較低及較易走。沿途視野寬廣，舉目及遠，景致甚佳。
路線：城門水塘 › 針山 › 草山 › 鉛礦坳
長度：約7公里
需時：約3.5小時
難度：3.5/5
起點交通：
- 由城門道行走至起點
- 乘搭的士至第六段終點的燒烤場下車
終點交通：須左走往城門道 (約1.5小時) 乘搭往荃灣之小巴離開
【麥徑八段：登上大帽山】
麥理浩徑第八段嘅路線跨越香港嘅最高峰大帽山，路線嘅升降幅度大，需要一定體力先可以。途中唔單止可以下瞰蔚林，亦能觀賞遠闊山景，適合喜歡親親大自然嘅行山人士。如果於春日適當嘅時間到訪，仲可以見到泛紅嘅樹葉～
路線：鉛礦坳 › 大帽山 › 荃錦公路
長度：約9.5公里
需時：約3.5小時
難度：3.5/5
起點交通：須乘搭小巴至城門道再行走至起點
終點交通：於荃錦坳荃錦公路乘搭巴士 51 號離開
【麥徑九段：路轉、人轉、景不轉】
相信唔少行山人士都會對麥徑九段「耍手擰頭」，雖然該行山徑難度較低，但麥徑九段景色比較沉悶。成段麥徑九段林蔭夾道，只有零星位置方有開揚景觀，行黎行去啲景色都差唔多，加上終點地處偏僻，想出返市區果陣只可以繼續行至大棠、掃管笏、屯門或經清快塘前往深井等地，所以大部分人都會一次過行埋麥徑第九、第十段。同時間，「麥理浩徑第九段」全段亦係越野單車徑，行山人士要小心單車往來。
路線： 荃錦公路 › 田夫仔
長度：約6公里
需時：約1.5小時
難度：1.5/5
起點交通：乘搭巴士 51 號於郊野公園落車
終點交通：須經過清快塘下走至深井先有車搭，包括巴士 52X 、巴士 53 號 、巴士 234A‧234B、小巴 96 號 、小巴 308M
【麥徑十段：千島湖美景】
「麥理浩徑第十段」係麥理浩徑之中最長嘅一段，全長15.5公里，因此行完成段路程都需要一定體力。沿途都可以近距離觀看大欖涌水塘嘅千島湖美景及尖削嘅青山。而由於起點位於田夫仔露營場，附近冇交通工具，最快只可以徒步由清快塘行3公里山上起點，因此唔少人都會一次過行埋麥徑第九、第十段。
路線：田夫仔 › 永吉橋 › 大欖涌水塘水壩 › 屯門
長度：約15.5公里
需時：約5小時
難度：3/5
起點交通：須乘搭巴士 52X、 53 號、 234A‧234B 於深井落車，再行約1.5小時到起點
終點交通：於屯門市區乘搭輕鐵、鐵路或巴士返回各區
想一次過行曬十條麥理浩徑難度就頗高，但分開幾次行就冇難度啦～每條路徑各有特色，無論係行山新手定老手都可以搵到適合自己嘅路線。趁住涼爽嘅週末，快啲約埋親朋好友一齊挑戰行麥理浩徑啦！
你可能感興趣的文章：