【拜見主子】軟萌嘅佢地療愈你心！首爾人氣動物咖啡廳！

香港都有唔少動物咖啡廳啦，韓國嘅又有咩特別啊？香港地少人多，小動物都唔夠地方同班奴才玩啦，今次介紹首爾呢4間動物咖啡廳以狗狗為主題，其中一間仲有埋浣熊添呀！又寬敞啲動物又得意，真係會玩到你唔想走嫁！

1. 구름뜬하늘 (多雲的天空) 狗狗Café

Café採用一人一飲料嘅入場費，每杯大約₩9000，之後就可以同狗狗玩啦！呢度係一個室內大平地，大型狗同小型狗都會一齊係呢個空間休息，我地可以任意同唔同狗狗打招呼架！


其中兩隻狗狗就係店名所叫嘅구름同埋하늘啦，我就臉盲認唔到嘅TT。

呢度有賣餵狗狗嘅零食，佢地嘅神之嗅覺/聽覺，一得知你買左零食，未開包裝都好，佢地已經包圍住你，等待你嘅餵養啊！

當咁多狗狗都圍住你嘅時候，梗系影認證照嘅時候啦！

圖片來源及查看更多：youngsoo0319

地址：서울 마포구 서교동 339-5 2층 구름뜬하늘

營業時間：平日及公休日 11:00-22:00、每月第二、四個星期二休館

2. The Mi Three 柴犬Café

呢間Café只有三隻柴犬，有別於其他狗狗Café，目前呢間係首爾唯一一間柴犬Café來嫁！柴柴魅力沒法擋啊！每逢有客人來，佢地都會衝去門口迎接大家，相當熱情嫁！

同樣地，呢間Café都係消費一杯飲料作為入場費，大約₩7000一杯。係收銀櫃位隔離有擺放幾包零食，一包₩1000咋！

另外可以購買餵比柴柴食嘅小食，佢地簡直係成精啊，你買完收得幾埋都好，佢地都會圍住你等你投餵！呢個時候最適合影翻幾張互動照啦！

店主係情侶檔，佢地好愛呢三隻柴柴，所以當你見到柴柴翻左佢地自己嘅休息區嘅話，就唔好諗住衝入去撩佢地啊，因為呢個區域唔比顧客入去嘈佢地，只有佢地自願出來先得嫁。

圖片來源及查看更多：shiba_mizz

地址：서울 용산구 녹사평대로40길 31

營業時間：平日 13:00-21:00 週末 13:00-22:00 星期三休館

*注意*：高中生或以上方可入場，不設兒童區

3.    라쿤카페 맹쿤 (浣熊咖啡廳)

一上到來就要先搵個儲物櫃存放個人物品，由於浣熊會挖衫袋褲袋嘅關係，耳環、手鍊手錶、項鍊等飾物都要放係櫃內，簡單啲來講就要唔準帶野入場內，另外仲要換埋拖鞋先得嫁。呢間Café就可以揀淨係比入場費或者買個入場費+飲品嘅套餐。記得賣完之後放翻銀包入儲物櫃先好入場啊。

呢間Café就有分場內同場外，只有場外可以飲野，亦可以隔住塊玻璃睇狗狗同浣熊。場內就係同狗狗浣熊玩嘅天地啦！

不過要注意嘅係，即使幾想抱浣熊都好，千其唔好硬來，因為佢地唔樂意嘅話可能會抓傷你嫁！

地址：서울특별시 마포구 서교동 358-2 4층

營業時間：每日12:30-22:30 年中無休

4.    바우하우스 (Bauhouse) 狗狗Café

呢間呢就係入場嘅同時就要買一杯飲料啦，之後職員就會問你想去小型狗區先定係大型狗區先，所以呢度係先去一個區，玩到悶就可以轉第二個。

大型狗區內嘅狗狗都好慵懶咁攤係沙發或者地下，等你地自己去摸佢地。但係周不時都會有一兩隻大狗突然大聲吠叫，然後就好似多米諾咁，其他大狗就會跟住吠。好驚啲吠叫聲嘅朋友就要小心啦！

小型狗區嘅狗仔都好多唔同種類，有幾隻會自動爬上沙發，窩係你大腿度訓覺嫁！即刻激發你內心深處嘅奴性啊！

圖片來源及查看更多：dogcafe_bauhouse

地址：서울특별시 마포구 서교동 394-44 제일빌딩 후면 1층

營業時間：每日13:30-23:00 年中無休

去首爾旅行嘅你，玩到悶或者遇到落雨嘅時候，就可以去幫襯下呢啲動物Cafe啦！