以前嘅深水埗係一個工業區，四周林立唔同嘅成衣批發店，但近年隨著各類咖啡店同特色選物小店相繼進駐，轉眼就變身為文青最愛嘅踏足之地！深水埗有唔少特色 cafe ，風格同裝修都頗有特色，當中不乏日本榻榻米 cafe、懷舊旋轉樓梯、純素甜品等，絕對能夠滿足一眾咖啡文青迷。以下將為大家介紹幾間深水埗文青cafe，等大家得閒可以約埋朋友去深水埗 cafe 歎咖啡食甜品！
1. Colour Brown - 工業風 coffee shop 旋轉樓梯打卡
呢間 cafe 有 3 層，地下係咖啡店，而上面兩層就係時裝店，等各位文青食完嘢仲可以購下物。 Cafe 以綠色為主調，鐵欄大門加上懷舊吊扇，復古工業風令佢喺深水埗眾多白色調嘅 cafe 中突圍。Cafe 入面嘅綠色旋轉樓梯更加係唔少文青慕名而去嘅打卡位！店內提供多款食物，例如牛角包、沙律、全日早餐，幾適合同朋友過來食個 afternoon tea。
圖片來自 OpenRice
地址：深水埗黃竹街13號地下 （Google Map）
OpenRice 連結：按此
2. 十常八九 - 日系榻榻米
除咗工業風 cafe ，深水埗都有唔少日式 cafe 㗎！呢間深水埗 cafe 採用木系裝修，客人可坐排凳或榻榻米，唔講仲以為去咗日本添！ Cafe 空間感充裕，手繪餐牌亦十分有心，如果想靜靜哋喺深水埗搵間 cafe 享受慢活時光，去呢間就最適合不過～ 食物方面，佢哋嘅「和栗蒙布朗」更係唔少食家推薦嘅甜品！
圖片來自 十常八九 Facebook
地址：深水埗黃竹街2號地舖（Google Map）
OpenRice 連結：按此
3. 習作 - 日本家庭式料理、手作 bagel
呢間深水埗 cafe 習作位於長沙灣道馬路邊，見到全原木嘅店面就會認到。Cafe 主打木系嘅日式裝修榻榻米同正常座位，空間感十足。習作主打日本家庭式料理同手作 bagel ，而 bagel 嘅口味更係定時更換，詳情可以留意佢哋嘅 Instagram 通知～ 小編提提大家，呢間 cafe 「一位難求」，想食嘅話最好就提前 book 定先喇！
圖片來自 習作 Facebook
地址：深水埗長沙灣道66號地舖（Google Map）
OpenRice 連結：按此
4. 素年 - 素食 cafe
近年越來越多人食素，而深水埗亦都開咗一間素食 cafe ，店主希望未曾或較少接觸素食的人也可一嚐素食滋味。Cafe 行簡約風，裝修以白色及木系作主調。店鋪主要提供蛋奶素食，當中有日式定食、美式漢堡、意粉同下午茶，無論你係咪素食者，都可以試試佢㗎！
圖片來自 素年 Facebook
地址：深水埗福華街191-199號福隆大廈1號地舖（Google Map）
OpenRice 連結：按此
5.Café Sausalito - 簡約水泥風
Café Sausalito 作為深水埗元老級嘅 cafe，今年重新裝修再開張，以簡約水泥風嘅新面貌呈現。Cafe 門口設有少量座位，方便客人帶埋寵物。而 cafe 除咗提供輕食，亦有一系列早午餐，例如 All day breakfast、意粉、多士等西式美食。 店內不時會搞 workshop 同二手咖啡市集，有興趣嘅話就要留意佢哋嘅Facebook 喇！
圖片來自 Café Sausalito Facebook
地址：深水埗大南街201號地舖（Google Map）
OpenRice 連結：按此
6. 一草一木 - 咖啡與塔羅
呢間深水埗 cafe 以療癒心靈為主題，將咖啡與塔羅合結為一。小店提供輕食同蛋糕，搵一個寧靜嘅午後，喺呢度飲返杯野占卜下塔羅牌都係一個唔錯嘅選擇～ 同其他深水埗 cafe 唔同嘅係，呢間小店裝潢風格相當特別，一入到去就會見到門前天花位置高掛著一個巨型月亮燈，十分搶眼。
圖片來自 OpenRice
地址：深水埗基隆街102號地舖（Google Map）
OpenRice 連結：按此
7. Rehab - 圓拱門摩登復古cafe
Rehab 係一間深水埗摩登復古 Cafe & Bar，圓拱門嘅設計特別，白磚背景映襯懷舊黑白地磚，打卡一流！牆上仲播放埋外國黑白電影，異國風情十足。 Cafe 設有半戶外座位，方便客人帶寵物。飲品方面，除咗供應精品咖啡，仲有招牌冰茶、Mocktail；而食物款式多樣，有蜜糖豬排、迷你牛肉漢堡等。
圖片來自 Rehab Facebook
地址：深水埗白楊街30號地舖（Google Map）
OpenRice 連結：按此
8. Openground - 集咖啡、書籍、展覽於一身
深水埗 cafe 雖多，但如果想搵到一間既賣咖啡，又同時展覽藝術嘅 cafe，就不得不去 Openground 喇！呢間 cafe 售賣設計、音樂同文藝等副產品嘅同時，亦用咗自家品牌咖啡豆製作咖啡。Cafe 入面嘅長枱連同靠窗、靠牆、吧枱位置，大約容納到 20 幾人，客人如流。
圖片來自 Openground Facebook
地址：深水埗大南街198號地舖（Google Map）
OpenRice 連結：按此
9. Dog99 Coffee．24小時人情味咖啡
Dog99 Coffee 係位於深水埗嘅一間24小時咖啡店，距離深水埗地鐵站B1出口約數分鐘步行路程。Cafe 以啡色為主調，店內有兩張主要木枱：一張bar枱面向咖啡師沖調位置，一張枱面向牆壁；另外有兩張座椅放於店外，小店空間唔大但人情味卻十足。
圖片來自 OpenRice
地址：深水埗福榮街23號地舖（Google Map）
OpenRice 連結：按此
睇完呢篇深水埗文青覓食攻略，你又有冇一間深水埗cafe心頭好呢？如果仲係唔夠喉，就要睇睇以下呢段深水埗cafe Vlog 喇！
你可能會有興趣：