相信最近大家碌 IG 嘅時候，都唔難會見到身邊啲朋友去晒人氣頗高嘅玉桂山行山打卡。相入面嘅玉桂山風景就緊係靚啦，唔單可以飽覽海景，仲有連島沙洲可以睇！但出名難行嘅玉桂山又係咪個個人都行到呢？即刻睇睇呢篇行山攻略，再衡量下適唔適合自己啦！
玉桂山簡介
玉桂山係鴨脷洲嘅最高峰，高196米，登頂可俯視深灣，對望海洋公園，遠眺南丫島。自港地鐵通車後，交通方便咗唔少，玉桂山亦好自然哋成為咗行山郊遊熱點。不過要留意返，玉桂並無政府鋪設嘅行山徑，上落崎嶇，同埋好多時候需要爬上爬落，如果無咁上下功力，就真係要「三思而後行」喇！
行山路線
路線：利東邨巴士總站 > 玉桂山 > 連島沙洲 > 鴨脷排 > 利東邨巴士總站（原路折返）
全長：3.5公里
時間：4小時
難度：中高
第一站：利東邨巴士總站
交通方面，大家只要喺港鐵利東站落車，由 B 出口搵到巴士總站，便可以搵到玉桂山入口處。入口處位於車長休息室後面，沿引水道左行，經過圍網，便可進入崎嶇山路。巴士總站附近有商場，大家可以喺呢到買定水同食物，方便於行山途中補充能量。
記得買定丶乛丨
第二站：玉桂山
沿著巴士總站後面嘅小路行一陣，就會見到三個分岔口：左邊嘅小路較為狹窄，周圍都係樹，但勝在較為平緩易行；中間路線較為陡峭，需要沿著前人留低嘅繩索爬上去，不過勝在一條直路上山，需時較快；而右邊嘅路線難度最高，唔單陡峭仲要無繩，同埋沿路都係碎沙碎石，但同樣勝在需時較快。因應能力揀一條適合自己嘅山路，便可以登上玉桂山啦！
圖片來自 香港01 & JoyeeWalker
玉桂山山頂嘅空地廣闊，景觀開揚。可以對望海洋公園，遠眺南丫島。
圖片來自 kaihin
第三站：連島沙洲
之後嘅行山路線係由玉桂山頂落到去下面嘅連島沙洲。呢段斜路非常崎嶇陡峭，路況以碎石為主，極考行山技術及體能，如果喺啱啱嘅路程已經覺得十分困難，就要自行衡量係咪繼續行落去喇！
圖片來自 kaihin
第四站：鴨脷排
經過沙洲，踏上石坡，行過山徑，就到達鴨脷排喇！呢到唔單可以望到燈柱，仲有個小碼頭。週末黃昏嘅時候，有時會見到船家在喺到兜客返香港仔。如果想抖下唔想原路折返玉桂山，就可以上船，船費十幾蚊左右。如果想原路折返，就記得預留充足時間喇！否則太遲返去，要摸黑落山嘅話，較容易發生意外㗎！
圖片來自 香港山誌
注意事項
1. 沿路較多浮沙碎石，且斜度極大，建議穿著行山鞋
2. 行玉桂山時，好多時需要手腳並用，建議帶備手套
3. 切勿過分依賴輔助繩索，特別係好多人同時拉動同一繩嘅時候
4. 實際行山時間或因個人技術而變化，記得自行衡量並預留充足時間
你可能會感興趣嘅其他文章