最齊全的東平洲玩樂攻略 | 夏日浮潛、露營聖地東平洲（內附交通方式）

假期想去下離島，但又唔想來來去去都係去長洲？如果唔想同人逼、想去啲冷門小小嘅離島，東平洲便係其中一個選擇！東平洲其實正式名為平洲，係香港距離中國最近嘅一個島仔。東平洲以佢獨特嘅地質出名，不過因為佢唔近市區，所以淨係得週末同公眾假期先有船前往，同埋船程都要成一個幾鐘㗎！至於值唔值得去，一於就睇完呢篇文章再決定啦！

東平洲地理位置

東平洲係香港最東北嘅島嶼，屬香港十八區嘅大埔區，位於大鵬灣。東面對岸就係深圳。由於地理位置較為接近中國內地，所以電話有時可能會收唔到信號。

東平洲交通及船期

於港鐵大學站步行約15分鐘至馬料水碼頭，轉乘前往東平洲嘅渡輪，船程約90分鐘，來回船票為$99。由於東平洲唔近市區，所以淨係得週末同公眾假期先有船，加上班次唔密，所以一定要睇定開船時間呀！否則錯過開船時間就要留喺東平洲過夜啦！

馬料水 —— 東平洲船期（禮拜六）

馬料水 —— 東平洲船期（禮拜日及公眾假期）

更多船期資訊：按此

漫步東平洲

東平洲地勢平緩，位於最高點嘅鶴岩頂都唔會超過50米，沿著郊遊徑環島一圈並唔需要太多體力，大約兩個鐘就可以輕鬆行完。如果驚唔夠體力都唔緊要，因為東平洲東岸都有唔少士多補給，肚餓都可以停落來食下嘢。成個島由沉積岩組成，有好多奇岩怪石同千變萬化嘅海蝕地貌，當中嘅頁岩更被喻為「香港四大自然奇觀」。無論你對地質有冇興趣，相信東平洲嘅風景都可以令你「眼睛去旅行」！

圖片來自：am730

圖片來自：NIGHTS INTO DREAMS

歷史古蹟

東平洲全盛時曾約有2000名居民，但四十年代果陣唔少村民因為政策遷回廣東，所以島上面遺留著好多廢棄村屋，大部分已經被樹木籠罩。不過都唔洗失望住，因為都仲有一啲建築仍然存在，當中包括天主堂、天后宮、譚大仙廟、龍麟咀燈塔，同埋海事處雷達站。大家遊漫步東平洲時，不妨停落來睇一睇，感受下建築物嘅特色。

假日士多

東平洲上面有唔少假日士多，提供簡約住宿服務同地道美食。美食方面，肚餓嘅話可以食到清蒸塔螺、海膽炒飯和秘製手撕雞；而天氣熱到想消暑時，仲有透心涼嘅自家製涼茶特飲可以試！

圖片來自：OpenRice

露營觀星聖地

如果想喺東平洲留耐啲，都可以考慮下露營。東平洲嘅營地位於著名景點更樓石隔離，落船過碼頭後轉左，沿石屎路一直行，經過士多、荒廢村屋，穿過天后廟落沙灘繼續沿海岸行，行到盡頭再入去樹叢就到達營地啦！

圖片來自：芳網

而喺東平洲露營最正嘅地方就係可以睇星星！由於東平洲冇水源同電力供應，當地居民都係靠井水同埋發電機自給自足。冇咗城市嘅光污染，夜晚嘅東平洲環境幽暗，可以睇到漫天星光。無論你係觀星愛好者，定係純粹與家人朋友來露營，呢度都係一個絕佳之地！

圖片來自：bellphoto

浮潛天堂

東平洲除咗以壯觀嘅地質出名，其實島上嘅生態都令人嘆為觀止！喺東平洲，你可以見到各式各樣嘅珊瑚群落同海藻床，如果季節適合，一定要喺東平洲浮潛睇海底生態！呢度好易搵到士多租浮潛用具，方便得來絕對係一個潛水好去處。不過正如上文所提及，東平洲臨近中國內地，所以島上面信號就唔係太好，小編喺度提提大家最好去之前做定功課search定潮汐時間。於每次漲潮及退潮（或退潮及漲潮）之間的中間位落水就最好。

圖片來自：SOUHU

唔知大家睇完呢篇東平洲攻略，又有冇興趣即刻行動出發呢？記得出發之前做定功課，預備充足食物同飲品，穿著適合嘅衣服同防曬裝備呀！

你可能會感興趣：

【露營推介】10個香港露營好去處：感受大自然的日與夜！

【香港野餐】最齊21個靚景草地 逐一點評｜鬧市中心、隱世秘境、無敵海景

【菠蘿山】屯門輕鬆行山遊：走進迷你大峽谷