講起馬灣，以前大家可能只會諗起挪亞方舟，但自從「馬灣1868」藝術村活化重開後，呢個小島已經搖身一變，成為文青、情侶同親子必去嘅慢活好去處！成個村落保留咗昔日漁村嘅紅磚屋，再髹上繽紛嘅色彩，變成超好打卡嘅「彩虹藝術村」。
今次小編就為大家整合馬灣1868嘅交通方法、打卡位、必玩活動工作坊、美食，以至兩日一夜嘅 Glamping 體驗，即刻睇吓點樣規劃你嘅馬灣一日遊啦！
馬灣1868 - 目錄
馬灣1868｜交通及前往方法
搭巴士係最方便嘅方法。推薦係馬灣 (珀欣路)落車，只需行3分鐘就行到去馬灣1868
1. 推薦落車站：馬灣 (珀欣路)
喺呢個站落車，步行約 3 分鐘 即可到達「馬灣1868」，係最快最直接嘅選擇！
| 路線 | 出發地點 | 車程 (估計) | 落車站 |
| NR331 | 港鐵荃灣站 | 約 23 分鐘 | 馬灣 (珀欣路) |
| NR331S | 港鐵荃灣西站 | 約 18 分鐘 | 馬灣 (珀欣路) |
| 230R | 港鐵九龍站 | 約 25 分鐘 | 馬灣 (珀欣路) |
2. 次選落車站：臨海廣場 (珀麗灣總站)
喺呢個站落車，需要步行約 10-15 分鐘 先到達「馬灣1868」，沿途會經過沙灘。
| 路線 | 出發地點 | 車程 (估計) | 落車站 |
| NR330 | 港鐵青衣站 | 約 12 分鐘 | 臨海廣場 |
| NR332 | 葵芳新都會廣場 | 約 18 分鐘 | 臨海廣場 |
| NR334 | 香港國際機場 | 約 35 分鐘 | 臨海廣場 |
| NR338S (日間) | 中環2號碼頭 | 約 35 分鐘 | 臨海廣場 |
| NR338 (凌晨) | 中環2號碼頭 | 約 35 分鐘 | 臨海廣場 |
3. 搭渡輪 (中環 / 荃灣出發)
如果你想沿途欣賞風景，搭船亦係一個好選擇。不過要留意，渡輪嘅落船點係「珀麗灣碼頭」，行路過去「馬灣1868」嘅路程會比較遠。
| 出發碼頭 | 抵達碼頭 | 船程 (估計) | 落船後步行時間 (往馬灣1868) |
| 中環2號碼頭 | 珀麗灣碼頭 | 約 25 分鐘 | 約 19 分鐘 |
| 荃灣碼頭 | 珀麗灣碼頭 | 約 15 分鐘 | 約 19 分鐘 |
馬灣1868｜景點及打卡位
「馬灣1868」本身就係一個巨型打卡點！呢度前身係馬灣舊村，保留咗好多歷史建築，活化後加入大量藝術元素，充滿異國風情。
彩虹階梯 & 七彩小屋： 必影打卡位！一排排髹上唔同顏色嘅小屋同階梯，好似去咗外國嘅彩色小鎮。
藝術壁畫： 村內有好多由本地藝術家創作嘅大型壁畫，好多都融合咗馬灣嘅歷史同海洋元素。
汲水門海景： 喺珀麗灣碼頭行去 1868 嘅必經之路，呢度可以影到青馬大橋嘅全景，日落時分超級靚！
馬灣1868｜必玩活動體驗 (工作坊 & 導賞)
馬灣1868最吸引人嘅，就係有超多特色手作工作坊同文化體驗，非常適合情侶、閨蜜或者親子一齊玩！
1. 馬灣1868｜馬灣古蹟古樹導賞及藝術漫遊
想深入了解馬灣嘅歷史？呢個 1 小時嘅導賞團就最啱。導賞員會帶你走訪急水門、九龍關舊址，講解古樹同壁畫背後嘅故事，完成後仲有紀念品㗎！
2. 馬灣1868｜Art Jamming 自助繪畫
喺一個輕鬆嘅環境自由創作，畫乜都得。無論你有冇經驗，都可以享受藝術創作嘅樂趣, 減壓一流。
3. 馬灣1868｜漢服體驗
提供大人同小朋友嘅精美漢服，仲可以預約古裝化妝同髮型設計。喺古色古香嘅村落影相，瞬間穿越時空！
4. 馬灣1868｜彩色、單色工藝扎染
用安全環保嘅礦物染料，親手將 T-shirt、環保袋或者帽扎染出獨一無二嘅圖案，令舊衫重生！
5. 馬灣1868｜霓虹燈冷光線藝術工作坊
想重現香港五光十色嘅霓虹招牌？呢個工作坊教你用冷光線製作屬於自己嘅霓Eon燈，將懷舊情懷帶返屋企。
6. 馬灣1868｜古法非遺造紙DIY
體驗中國四大發明之一嘅「造紙術」！呢個非物質文化遺產DIY，可以畀大家親手感受古法造紙嘅魅力，非常有教育意義。
7. 馬灣1868｜夕島金柴 硬幣戒指工作坊
零經驗都玩得！喺專業導師指導下，親手將一枚舊硬幣，經過敲打、塑型同打磨，變成一隻獨一無二嘅紀念戒指。非常適合情侶或閨蜜打造對戒。
8. 馬灣1868｜狗狗貓貓鼻紋吊墜製作
每隻寵物嘅鼻紋都係獨一無二！呢個工作坊可以幫你將主子嘅鼻紋製成精緻嘅銀吊墜，成為永恆嘅紀念。你可以帶狗狗親臨馬灣 1868 現場取模，亦可以揀郵寄套裝喺屋企 DIY。
馬灣1868｜餐廳美食
米九十 (Iki Cafe) - 隱世日系家庭小屋
「米九十」係一間隱藏喺馬灣大街村中嘅人氣小店，成間舖頭無論內外都充滿日本和風感覺，好似去咗日本小旅行。餐廳主打精緻嘅日本家庭式料理，例如日式定食、天婦羅蕎麥麵同 All Day Breakfast。想搵個地方靜靜哋、打卡又靚，呢度絕對係首選。
-
地址： 馬灣馬灣大街村中243號地舖
La Rosabelle Bar & Grill - 絕美日落海景西餐
想對住青馬大橋食飯睇日落？呢間西餐廳係睇日落嘅最佳位置之一！餐廳座落喺珀麗灣沙灘商場，有無敵海景同露天沙灘座位，藍白色嘅地中海風設計充滿渡假Feel。佢哋主打多國菜，有牛扒、意粉、薄餅等選擇，最啱黃昏時段嚟，一路嘆住美食，一路睇住鹹蛋黃慢慢沉落青馬大橋，超級浪漫！
-
地址： 馬灣珀麗灣沙灘商場1樓6號舖
The Shack - 藝術村內嘅地中海風情
呢間餐廳就喺「馬灣1868」藝術村入面！The Shack 係一間融合地中海同日式風格嘅小型餐廳，無論坐喺大樹下定落地玻璃窗前，都可以望到海景。餐廳提供創意小食（例如開心果朱古力蛋糕）、豐富正餐同特色飲品，仲係一間寵物友善餐廳，好適合帶住毛孩嚟，喺藝術村玩完工作坊之後，直接過嚟Chill吓。
-
地址： 馬灣1868 16-17號屋
馬灣1868｜馬灣露營地點
想玩盡兩日一夜？馬灣公園嘅「小島山丘Glamping」絕對係首選！
1. 馬灣1868｜豪華露營新體驗
提供兩日一夜嘅「野奢山丘小屋營」，全套露營裝備、煮食爐具、冷氣、床墊都準備好，真正「兩手Fing Fing」去露營。體驗仲包埋一節免費工作坊！
2. 馬灣1868｜【寵物友善】小島山屋
呢度有寵物友善營 (Pet-Friendly Cabin)！指定小屋營設有毛孩專用床墊，你可以同主子一齊享受 Glamping 樂趣，喺草地盡情放電。
馬灣1868｜鄰近景點：香港挪亞方舟
一場嚟到馬灣，點可以唔去埋地標「挪亞方舟」？呢個全球唯一根據遠古記載以 1:1 比例建造嘅主題公園，非常適合親子同遊。
園內有超多互動遊樂設施：
飛躍星際太空人訓練： 變身太空人，體驗駕駛宇宙飛船，激發小朋友對宇宙嘅好奇心。
家庭單車 & 平衡車： 喺大自然環境下，一家大細一齊踩家庭單車，或者挑戰平衡車，盡情放電。
童趣健樂園： 以「火箭」為主題嘅遊樂園，有超高滑梯同空中繩網，考驗體能同膽量。
大自然主題光影互動展館： 全港首個大自然主題光影展館，穿梭森林、海洋等展區，投入沉浸式打卡之旅。
