大嶼山天壇大佛係世界上第二大嘅戶外青銅座佛，更係香港嘅著名旅遊景點之一。咁究竟天壇大佛有咩好行？！其實鄰近有好多特色景點可以行下欣賞下，而今次就等ReUbird 小編帶你行「攞你命樓梯」- 大嶼山嘅天壇大佛一日遊啦！
【雙11優惠】最平$11！各大平台雙11優惠大放送：酒店自助餐/人氣網購/門票優惠（持續更新）
天壇大佛一日遊行程建議路線：
天壇大佛附近有好多唔同嘅景點，而小編就為大家plan咗以下嘅一日遊行程：
📍天壇大佛> 寶蓮禪寺（可享用午餐）> 心經簡林> 繼續行山/ 昂坪市集> 回程
第一站 - 天壇大佛
天壇大佛係一座坐落木魚峰嘅釋迦牟尼佛像，想近距離賞佛，就要先行268級嘅石階（寓意香港「一路發」）然後到最高處仰望大佛。
雖然聽落好似好多級石階，但其實需時只需約10-20分鐘就行到上去架喇，沿路仲可以欣賞下風景！
🌟 上去之前，小編建議可以先喺入口嘅售票處購買齋菜套票，會包括：
- 齋菜小食
- 憑券免費參觀大佛內庭
圖片來源：TripAdvisor
登頂之後，大佛有分基層同上層：
- 基層類似香堂，供奉嘅係香港市民逝世後嘅排位；
- 上層就係保存咗各地居士送贈嘅書畫，值得一睇。
圖片來源：Holimood
天壇大佛交通
地址位於香港大嶼山木魚峰昂坪天壇大佛，但究竟天壇大佛係點去呢？
首先到達港鐵東涌站B出口後，可以揀以下方法去天壇大佛：
1. 新大嶼山巴士
路線：23號（東涌達東路巴士總站 > 昂坪）
車程時間：約50分鐘
車資：平日$18.7；假日$31.0
最新消息或想了解時間表可按此。
💡溫馨提示：車程路線大部份都係彎彎曲曲，上坡又落坡，容易暈車浪嘅朋友們記得預備定暈浪丸！
圖片來源：香港巴士大典
2. 昂坪360纜車
車程時間：約25分鐘；下車後，再步行約10分鐘
車資：約$100多 - $290
詳請可以去返官網了解最新消息。
圖片來源：昂坪360
3. 離島的士
車程時間：約40分鐘
車資：約$200 - $250
小編就覺得其實的士車程時間同新大嶼山巴士相若，但車費足足貴左好多！
所以就建議大家可以出發之前先了解巴士時間表，預留小小時間等下巴士仲好～
圖片來源：香港01
💡小編提提你：
天壇大佛依家正在進行維修保養，佛像會被遮蓋及部分相關場地將會關閉，寶蓮禪寺嘅宗教活動則如常進行。
去之前記得先去佢地官方網站或者寶蓮禪寺Facebook Page了解清楚詳情先呀！
第二站 - 寶蓮禪寺（寶蓮寺）享用特色齋菜、參觀禪寺
來回行完長長嘅石級，拜完佛之後去邊好？
緊係要去埋附近常被稱為「南方佛教世界」嘅寶蓮禪寺啦！
除左可以參觀禪寺，仲可以去入面嘅齋堂品嚐齋菜！
位置：大雄寶殿左手邊（面向大雄寶殿）
記得事先喺入口嘅售票處購買齋菜套票呀！如果唔係就有機會要等位架喇。
圖片來源：OpenRice（想知道大概有咩菜式都可以去下OpenRice去睇下呀！）
大雄寶殿
參考咗北京故宮建築風格。
圖片來源：寶蓮禪寺官網
萬佛殿
供奉逾萬尊佛像，金碧輝煌，非常壯觀架！
圖片來源：香港商報
另一邊廂亦有以對稱興建嘅彌陀殿、地藏殿、齋堂、僧堂等。
到達時，首先見到嘅殿堂係較新，而較舊嘅殿堂就喺後面。可以多加留意一下。
第三站 - 心經簡林
代表住生生不息嘅心經簡林，親身去睇真係非常之宏偉！
- 高達8-10米嘅38條花梨木柱排列成「∞」（無限）嘅大型戶外木刻群
- 當中37條刻有《摩訶般若波羅蜜多心經》
- 山坡最高位置嗰一條並無刻字，象徵住《心經》入面「空」嘅要義
小編靜靜雞話你知，因為位處高山，所以一帶偶然會有霧霞出現，就彷彿處於仙景入面咁！係仙氣呀！
圖片來源：昂坪360官網
心經簡林點去？
位於大嶼山鳳凰山山麓，由寶蓮禪寺或天壇大佛步行大概10分鐘即可到達。
行程建議：如果鐘意行山嘅你，更加可以行埋彌勒山郊遊徑和鳳凰徑作為你地嘅下一站⛰！
第四站 - 昂坪市集買手信、打卡
最後一站就可以去埋昂坪市集喇，位於香港昂平路111號。
從心經簡林步行約20分鐘就可以到達！
行完市集之後，附近就已經有車可以離開。
昂坪市集唔單止有10多間美饌佳餚、地道小食、特色手信，仲有唔同嘅打卡位影相！
- 祝福鼓
- 菩提許願樹
圖片來源：昂坪360官網
如果怕行完以上行程之後太晏嘅話，小編就覺得其實都可以將昂坪市集放喺第一站的：）
搭23號新大嶼山巴士，不過可以早一個站喺昂坪市集落車
由昂坪市集步行出發去天壇大佛都只需約10-15分鐘路程。
以上地點之開放日子及時間：
天壇大佛：星期一至星期日（包括公眾假期）上午10:30 至 下午5:30
寶蓮禪寺：星期一至星期日（包括公眾假期）上午9:00 至 下午6:00
齋堂：星期一至星期日（包括公眾假期）上午11:30 至 下午4:30
心經簡林：全年開放
昂坪市集：平日上午10:00 至 下午6:00；週末及公眾假期上午9:00 至 下午6:30
活動費用：
所有入場全免費用。
齋堂：需票先喺入口嘅售票處購買套票：珍味素（$110/人）或 貴賓齋（$150/人）
睇完ReUbird 小編為您規劃以上咁充足嘅行程之後，快啲準備出發朝聖，過一個與都市生活不一樣的一天啦！！！