由韓國帶起嘅杜拜朱古力熱潮，已成為香港甜品界嘅人氣王！
之所以咁受歡迎，係因為杜拜朱古力唔止係得「朱古力 + 開心果」咁簡單，仲加入 Knafeh 之類嘅脆脆麵絲，配搭煙韌麻糬、拉絲棉花糖皮，發展成層次豐富嘅創意甜品，食落充滿驚喜感。
如果你都想試下呢股杜拜朱古力熱潮，呢篇文章精選咗全港 8 間必試杜拜朱古力，帶你一次過試齊杜拜朱古力麻糬、杜拜朱古力蛋糕等甜品款式！
全港8間杜拜朱古力推介｜目錄
- 杜拜朱古力推介｜Soulgood Bakery
- 杜拜朱古力推介｜LIFETASTIC
- 杜拜朱古力推介｜Guge Cakery
- 杜拜朱古力推介｜Kactus Koffee
- 杜拜朱古力推介｜Sugar bothers hk
- 杜拜朱古力推介｜Yeon Nam Dong
- 杜拜朱古力推介｜享樂烘焙
- 杜拜朱古力推介｜Lady M
拎埋優惠碼享更多折扣！
全港8間杜拜朱古力推介：
杜拜朱古力推介｜1. Soulgood Bakery：杜拜朱古力麻糬、杜拜朱古力巴斯克
人氣巴斯克蛋糕店 Soulgood Bakery 一次過推出多款杜拜朱古力甜品，包括韓國爆紅杜拜朱古力麻糬，仲有杜拜朱古力曲奇、杜拜朱古力蛋糕等，好啱想一次過試埋多種杜拜朱古力推風格嘅甜品控。
Soulgood Bakery 研發出最強比例的杜拜朱古力麻糬「杜拜棉花糖曲奇」！以特濃朱古力配搭為香港而設嘅低糖棉花糖，加入超多份量嘅 Kataifi，再疊加濃厚開心果醬，咬落去係外層煙韌、內餡酥脆嘅雙重口感。朱古力控、開心果控都瘋狂！
將朱古力曲奇同杜拜開心果酥脆麵絲完美融合，食落層次感滿滿。
先食到朱古力嘅甜美，再試到開心果濃厚嘅味道，最後再喺口中爆出麵絲嘅酥脆香，幾層口感由「甜→濃→脆」一氣呵成，整體香脆鬆化，唔會太重手，好啱做飯後小點。
以法國朱古力巴斯克做基底，加入足足一層杜拜開心果麵包絲，再鋪上開心果鮮忌廉同西西里島開心果碎，每一啖都係朱古力同堅果香，層次感非常明顯，口感偏綿密但唔會滯。
巴斯克芝士蛋糕成分有約 70% 芝士，由日本雞蛋同美國忌廉芝士組成，糖份相對一般食譜減少 30%，做得比較「甜而不膩」。
「杜拜開心果朱古力 芭菲杯」以杯裝形式將杜拜開心果變得更加輕盈、易入口～
杯內有朱古力、忌廉、脆脆同開心果幾層，用匙羹慢慢挖落去，可以逐層感受到口感變化，由滑潤忌廉到香脆麵絲，再到開心果嘅濃郁，甜度分開層次，一口一口慢慢食，作為下午茶甜品就好適合。
除咗超熱門杜拜朱古力系列，Soulgood Bakery 亦緊貼另一股由韓國吹起嘅甜點潮流，推出「貝殼牛油年糕」！
牛油年糕提供原味、伯爵茶同朱古力三種口味。外層金黃微焦帶有牛油香，內裡則係軟糯年糕質地，食落係「外脆內軟」有一種淡淡甜潤感。
杜拜朱古力推介｜Soulgood Bakery｜詳情
- 優惠及預訂：按此預訂可享優惠
- 地址：九龍尖沙咀梳士巴利道18號 K11 Musea B2層 B201-39舖
銅鑼灣軒尼詩道500號希慎廣場B1樓B105B號舖 - 營業時間：星期一至日 13:00-19:00
杜拜朱古力推介｜2. LIFETASTIC：杜拜朱古力層式蛋糕
人氣層式蛋糕店 LIFETASTIC 推出杜拜朱古力蛋糕，將杜拜朱古力元素加入精緻嘅層式蛋糕，賣相與味道兼具！
蛋糕以朱古力同開心果為主軸，頂層鋪上香脆開心果碎同濃郁開心果餡料，中間由開心果忌廉同班蘭海綿蛋糕組成，帶來淡雅清香同輕柔口感，底層則係朱古力忌廉同朱古力海綿蛋糕，味道偏濃但唔會太甜，層層疊疊就像由輕盈到濃厚慢慢遞進。
杜拜朱古力推介｜LIFETASTIC｜詳情
杜拜朱古力推介｜3. Guge Cakery：杜拜開心果朱古力麻糬蛋糕、手工杜拜朱古力
Guge Cakery 一向以低糖配方同層次豐富嘅蛋糕見稱，兩款杜拜開心果朱古力甜品都係以「入口唔會太甜，但層次好清楚」為主，既保留熱潮元素，又唔會太重手。
Guge Cakery 嘅杜拜開心果朱古力麻薯蛋糕，係將「麻薯煙韌＋開心果＋朱古力」幾種元素融合得幾自然嘅一款。
蛋糕表面係 60% 黑朱古力裝飾，入口會先食到一陣微苦朱古力香，緊接而嚟就係雲呢拿忌廉同麻糬軟糯餡料，內層則加入香濃開心果脆絲同意大利開心果醬，令整體層次由外層微苦、中層柔軟到內餡香脆同堅果香。
另一款「杜拜開心果朱古力」則偏向手工路線，以脆皮黑朱古力外層包住內裡厚厚開心果脆絲，咬落去係一層香脆朱古力殼，再爆出濃郁開心果碎，口感香脆可口。
杜拜朱古力推介｜Guge Cakery｜詳情
- 優惠及預訂：按此預訂可享優惠
- 地址：觀塘成業街華成工商中心12樓11室
- 營業時間：星期一至六 13:00 - 18:00
杜拜朱古力推介｜4. Kactus Koffee：杜拜朱古力麻糬
Kactus Koffee 係其中一間將「杜拜朱古力麻糬」帶入香港嘅街坊小店嘅代表，主打即買即食，而且評價幾高，係好多人會特登去試一試。
呢款杜拜朱古力麻糬，外層包裹一層可可粉，咬落口會先嚐到微苦朱古力香，中間係煙韌麻糬＋開心果脆絲，內餡係滿滿韓式嘅開心果麵絲同開心果醬，層層疊起，由外脆、中軟、到內裡香脆＋堅果香，口感非常豐富。
最重要係甜度唔會甜，可以外帶或堂食，配上一杯咖啡。
杜拜朱古力推介｜Kactus Koffee｜詳情
- 地址：油麻地文英街47號
上環皇后大道西27號地下 - 營業時間：星期一至日 08:00 - 20:00（上環分店 22:00）
杜拜朱古力推介｜5. Sugar brothers hk：「芝麻版」杜拜朱古力麻糬
Sugar brothers hk 係一間主打「細心手工＋同質高」嘅本地甜品小店，背後更有五星級酒店甜品師班底。
佢哋以杜拜朱古力麻糬最為人氣，外層係沾滿可可粉嘅煙韌棉花糖麻糬，咬落唔會好似平時糯米糍咁軟糯，反而係一種帶少少嚼感、富有彈性嘅口感，入面有超多開心果醬加開心果脆絲，一件就好滿足。
食過嘅網友都大讚杜拜朱古力麻糬入面嘅開心果味同脆絲結合得非常好，唔係單純跟風，而係真係有層次同存在感。
而且佢哋仲特別研發咗「芝麻味」版本杜拜朱古力麻糬，用相近概念加入濃郁黑芝麻，同樣有麻糬、脆脆同芝麻醬層次。
杜拜朱古力推介｜Sugar bothers hk｜詳情
- 地址：佐敦長樂街 19 號 4 – 5號舖
- 營業時間：星期一至日 11:00 - 19:00（麻糬系列星期六、日限量發售）
杜拜朱古力推介｜6. Yeon Nam Dong：最接近韓國版的杜拜朱古力麻糬
Yeon Nam Dong 係一間由韓國大廚主理、帶少少法式裝修風格嘅韓式小餐廳，佢哋近期推出嘅「杜拜朱古力麻糬」，仲被唔少網民譽為「味道最接近韓國版」嘅其中一款。
呢款杜拜朱古力麻糬，外皮係一層薄薄嘅麻糬，沾滿濃郁可可粉，咬落會有少少拉絲同煙韌感，內裡則係塞滿厚厚開心果醬同超多嘅 Kadaif脆絲，每一啖都係脆脆同堅果香，完全係「外軟糯、內香脆」嘅極致對比，開心果味非常突出，但甜度唔會太誇張。
杜拜朱古力推介｜Yeon Nam Dong｜詳情
- 地址：西環西營盤高街46C號地舖
- 營業時間：星期一至日 12:00 - 23:00
杜拜朱古力推介｜7. 享樂烘焙：杜拜朱古力糯米糍
講起享樂烘焙，大家第一時間通常會聯想到佢哋招牌嘅Bagel，不過近年仲進一步跟住韓國熱潮，推出咗杜拜朱古力麻糬，開賣一日已經有長長嘅人龍。
佢哋嘅杜拜朱古力糯米糍，改用「糯米糍」取代傳統嘅棉花糖外皮，令甜度有所減輕，同時依然保留咗咬落有少少拉絲嗰種手感，入口係柔軟煙韌，內層則係自家研磨嘅開心果醬，香氣純粹，層次比一般即食麻糬更加細緻。
麻糬版本分為「棉花糖外皮」同「糯米外皮」：糯米版本喺海港城期間限定店同分店都有售，但棉花糖版本就只限海港城期間限定店，所有款式都係限量供應＋設有每人限購數量。
杜拜朱古力推介｜享樂烘焙｜詳情
- 地址：查看分店地址
杜拜朱古力推介｜8. Lady M：杜拜朱古力千層蛋糕
Lady M 一向係以精緻千層蛋糕聞名，而今次就將品牌經典嘅千層蛋糕同韓國熱潮杜拜朱古力結合，打造成一款奢華甜點。
蛋糕頂層係以混合開心果醬料製成嘅脆餅，鋪滿充滿開心果醬嘅酥脆 Kataifi，咬落先係鬆脆、香濃，緊接而嚟係中間嘅手工朱古力班戟皮，夾層則填滿開心果鮮忌廉同朱古力鮮忌廉，由上而下，口感由鬆脆到幼滑，層層分明但又互相呼應，整體質感非常豐富，每一啖都充滿開心果同朱古力嘅濃郁風味。
杜拜朱古力推介｜Lady M｜詳情
- 地址：查看分店地址
無論你係鍾意街頭即買即食嘅杜拜朱古力麻糬，定係傾向高級下午茶風格嘅杜拜朱古力千層蛋糕，香港其實都有好多選擇，可以試晒唔同版本嘅杜拜朱古力～ 甜品控記得save底呢篇文章，趁空閑時間去覓食啦！