如果你有睇過 2015 國家地理攝影大賽嘅冠軍作品，一定唔會對飛鵝山嘅壯麗景色感到陌生。位於九龍東北嘅飛鵝山，座落於九龍半島、沙田同西貢之間，可以俯瞰九龍全景，係唔少人慕名而去嘅攝影同行山好去處。而如果唔想行山又想飽覽飛鵝山美景嘅話，都可以直接搭車上去！想知更多，即刻睇文啦！
飛鵝山基本資料（適用於徒步登山人士）
全長：約7-8公里
路線：飛鵝山道 > 飛鵝山 > 自殺崖 > 象山 > 東山 > 吊草岩 > 慈雲閣
全程需時：約4小時
難度： 高
曝晒指數：65%
意外及迷路風險： 90%
特別提示：飛鵝山南脊石崖(即自殺崖一帶)已被漁護署列為曾發生致命及嚴重意外的高危地點之一
飛鵝山交通
登上飛鵝山嘅路線主要分為搭車同行路上山，兩者嘅交通都唔算太難。
方法一：揸車上山
駕駛者可經東邊嘅飛鵝山道上山，但要留意道路屬於單程路，落山時需經扎山道前往彩雲村。
方法二：乘搭的士
如果唔方便自己駕駛，都可以在喺港鐵彩虹站搭乘的士，沿新清水灣道同飛鵝山道，直達飛鵝山觀景台。
方法三：乘搭交通工具
出發嘅時候，可乘搭由九龍灣德福花園開出嘅1號小巴、彩虹站小采頤花園嘅1A小巴，於飛鵝山道路口落車，經由 328 登山徑拾級而上；
回程時可乘搭小巴37M往黃大仙港鐵站，巴士2F、3C、3M、15A等往各區。
方法四：行山
由慈雲山出發，經沙田坳道登上飛鵝山。飛鵝山登山口位於百花林石碑後左邊車道旁的登山徑，入口有人喺石上刻咗328用以識別。
圖片來自 Kelvin Yuen
飛鵝山特色
1. 觀景台
飛鵝山海拔603米，係九龍群山中最高嘅一座山。去到飛鵝山，點都要去觀景台飽覽九龍半島、香港島及西貢白沙灣一帶景色啦！如果你係行山新手或者懶得制唔想行都唔怕，因為搭的士都可以直達飛鵝山觀景台。
圖片來自 就是沙拉
2. 飛鵝山自殺崖
而飛鵝山另一個特色就係自殺崖喇！呢度喺近年都成為打卡熱點。但叫得「自殺崖」，梗係唔係個個人都輕易去到㗎啦！前往自殺崖的山路絕非新手路線，路程崎嶇漫長，途中須爬過一啲大石。如果行山經驗唔係太豐富，遠遠哋望下就好，就唔好冒險喇！
圖片來自 LIHKG
登山小提示
1. 建議穿著長褲，避免會被路邊嘅長草割傷
2. 帶定蚊怕水，做好防蚊措施
3. 帶備充足食水
4. 如果想喺山頂觀賞日出或日落，建議帶備頭燈或手電筒於天黑時使用
5. 攝影人士記得行山前睇定當日天氣狀況，以免白走一趟
睇完呢篇飛鵝山行山簡介後，你又諗住挑戰難度徒步登山，定係hea hea哋搭車上去呢？
你可能會感興趣：