想告別單身，同心儀嘅對象喺感情上更進一步？咁就要搵個適當嘅時機表白喇！一個好嘅表白方式，唔單可以增加成功機率，仲可以為兩個人留低美好嘅回憶。如果你都煩惱緊點樣出pool，不妨睇睇以下介紹嘅表白方式啦！
1. 約會表白
呢種表白方式比較適合性格外、唔太怕尷尬嘅人。可以試下將心儀對象約喺 café、海傍，或者其他安靜嘅地方，寧靜嘅環境唔單方便營造氣氛，自己亦更加容易講出表白說話。時間方面，可以選擇傍晚或者夜晚，因為呢個時段通常大家都處理完手頭上嘅工作，個人輕鬆啲，表白成功機率都大啲！
圖片來自 Ulifestyle
2. 借朋友之力表白
如果個人怕羞嘅，不妨搵下身邊啲 mutual friends 幫下手啦！根據非正式統計，有超過八成嘅愛情，係由友情產生：一對情侶由陌生人變成朋友，再進而變成情侶，都好合理呀～ 但如果太 friend，又容易被人 friend-zone 喎。唔想收到好人卡嘅，可以請求下 mutual friends 出手， 喺適當嘅時候，以揭露秘密嘅方式，同你嘅心儀對象講：「其實你知唔知呢，阿邊個一直對你……」（咁當然呢位朋友最好都醒醒目目，同埋本身對你/你心儀嘅對象無「非分之想」啦）
圖片來自 集圖網
3. 寫情信表白
就算喺現代社會，情信依然係表白嘅最好方式之一。透過呢種方式表白，唔單可以較為含蓄哋表達到對心儀對象嘅情感，仲會顯得好浪漫添！如果你嘅性格內斂，不妨考慮下用呢種方式表白啦！
圖片來自 香港01
4. 製作影片表白
如果鍾意咗一個人好耐，但又唔夠膽當面表白，咁不妨試下用影片嘅表白啦！你可以提早準備一啲表白影片，跟住揀一個適當嘅時機喺佢面前播放。影片嘅內容可以包含多種語言嘅「我鍾意你」，又或者可以擺一啲兩個人開心嘅片段。如果大家有共同朋友嘅，都可以叫唔同朋友幫手錄片，說服心儀對象應承你。 呢種另類嘅表白方式，一定氹到佢開懷大笑啦！
圖片來自 the independent
5. 特殊日子表白
又或者可以試下喺情人節、聖誕節或者係對方生日呢啲特殊日子表白。事前摸索下對方鍾意啲咩，之後再喺當日將份禮物送畀心儀嘅對象。如果怕羞嘅，可以試下喺禮物中夾住一封情信，等對方拆禮物時領悟到你嘅心意；亦可以喺送禮嘅時候直接表白，可能都會有意想不到嘅收穫㗎！
圖片來自 花禮網
唔知以上嘅表白方式又有無幫到你呢？點都好啦，小編喺度建議大家表白前約多幾次心儀對象出街，試探下佢嘅心意，等拎到十足嘅把握，用埋上述嘅表白方法，成功率都高啲㗎！祝大家可以成功出 pool！
你可能會有興趣嘅文章：