蚺蛇尖係唔少行山愛好者視為人生必去一次嘅攀登目的地，雖然山路陡峭又多碎石，不過勝在喺山頂可以環顧西貢嘅山巒海峽，氣勢十足！蚺蛇尖景色靚還靚，小編都要提提大家，蚺蛇尖非新手路線、具一定難度，所以大家去前務必做足功課，量力而為。
蚺蛇尖介紹
蚺蛇尖位於西貢東，海拔高度 468 米。而蚺蛇尖之所以叫做蚺蛇尖，相傳係因為呢到因為以往生產蚺蛇，或者因為佢山勢似蜿蜒昂首嘅蚺蛇。同時，由於每條山路都極為陡峭，所以一度被譽為「香港第一險峰」，亦因此被唔少登山人士視為攀登挑戰嘅目標。
蚺蛇尖行山資料
路線：北潭凹 > 赤徑 > 大浪坳 >蚺蛇坳 > 蚺蛇尖 (原路折返)
長度：13 公里
時間：6.5小時
難度：中高
第 1 站：北潭凹
想行蚺蛇尖，通常第一站就係北潭凹。以下有幾個交通方式供大家參考：
1. 搭車：於西貢市中心乘搭巴士 94/96R 喺北潭凹落車 （巴士時間表：94、 96R）
2. 自駕：於北潭涌泊車，並乘巴士 94/96R 喺北潭凹落車（巴士時間表：94、 96R）
3. 搭船（最輕鬆）：如果唔想行太多路，可選擇喺黃石碼頭搭船達到赤徑，咁就可以慳返由北潭凹至赤徑嘅 3 公里路程。船程約 2 小時 （船期資料：按此）
大家喺北潭凹落車後，橫過馬路，行前兩步，便到達麥理浩徑第2段嘅入口。附近有公廁、 飲品售賣機同加水站，如果未帶足飲料，便可以喺到作最後補給。
圖片來自 HK01
第 2 站：赤徑
沿麥理浩徑2段上斜，初段係較為好行嘅石屎平路，大約30分鐘嘅路程，便到達海邊嘅赤徑。經過幾間殘落嘅村屋、路過一個小碼頭，沿著海邊小徑行，就去到赤徑公廁。呢個係上蚺蛇尖前嘅最後一個公廁，如果有需要嘅可以去定先。
圖片來自 flickr
第 3 站：大浪坳
離開公廁後過橋，沿麥理浩徑上斜，開始由海平面上山。行到中段會見到個路牌，大家可以跟住佢往鹹田方向行。呢段斜路係上蚺蛇尖前嘅熱身，如果覺得已經好辛苦，就不宜勉強上蚺蛇尖。
大約行 45 分鐘，便會到達大浪坳。呢個位置係好多行山人士休息嘅熱門地方，大家都會坐喺到作中途休息。
圖片來自 WeShare
第 4 站：蚺蛇坳
離開大浪坳，沿著呢個位置上去，景觀便開始開揚，山徑亦逐漸變得原始。
圖片來自 HK01
沿著小路不斷行，就到達蚺蛇坳。
第 5 站：蚺蛇尖
跟住就到要開始挑戰高難度山徑喇！前往蚺蛇尖嘅路徑唔單佈滿砂礫碎石，仲要非常崎嶇陡峭，好多時候需要手腳並用。大家記得衡量下路況，再決定係咪繼續前往。
成功到達蚺蛇尖山頂後，便會見到壯觀嘅西貢海景。如果上完山，覺得自己體力尚可，可以考慮繼續前往米粉頂同鹹田灣。詳細路線可參閱 蚺蛇尖．米粉頂．三灣．「香港第一尖」風景豪華版
圖片來自 fitz.hk
注意事項
1. 屬官方4星路線，唔適合新手。體力不足及方向感差嘅朋友可以請有行山經驗人士一併前往。
2. 需要手足並用，建議帶備手套、穿著長褲及行山鞋。
3. 此路線除咗北潭凹外就無補給點，記得帶備足夠嘅食水及乾糧。
你可能會感興趣嘅其他行山文章：