又到週末，你又諗好去邊到郊遊未呢？未諗好都唔緊要，今次小編就為大家介紹一段簡單輕鬆嘅郊遊路線 -- 紅香爐峰。 紅香爐峰位於港島區嘅寶馬山上，山高只有230米，全程30分鐘，輕輕鬆鬆便可以行上山飽覽維港海景。天氣好嘅話，仲可以觀賞埋日落添！非常適合想行短途路徑活動筋骨嘅港島人～Let's go！
路線簡介
路線：聖貞德中學 > 金督馳馬徑 > 紅香爐峰 >金督馳馬徑 > 聖貞德中學
全長：1.5公里
時間：30分鐘
難度：簡單
第1站：聖貞德中學
起步於聖貞德中學，大家可於天后站乘搭49M小巴，或者於銅鑼灣乘搭25小巴，並於寶馬山總站落車。落車後，橫跨馬路到達聖貞德中學，就可以由中學旁邊嘅階梯進入山徑。
行幾步之後，沿著斜路上斜，就會見到分叉路口，之後轉右向渣甸山方向行，到達金督馳馬徑。
圖片來自 LG
第2站：金督馳馬徑
金督馳馬徑較為平坦，亦極之易行。步行約5分鐘左右，就會見到右邊有條山徑，而呢個就係登上紅香爐峰嘅路喇！
圖片來自 LG
終點站：紅香爐峰
沿著呢條較為斜嘅山徑上山，再攀過幾塊大石，便到達紅香爐峰喇！呢到非常開揚，唔單可以飽覽維港海景，仲可以觀賞埋日落，行山完全無難度！而睇完靚景，便可原路返回離開。
圖片來自 九十後小薯仔行山經歷
上到山，見到咁壯麗嘅景色，真喺行得攰都抵返曬啦！
圖片來自 背包客棧
溫馨提示：
- 沿路要攀爬，建議著防滑鞋
- 夜晚去記得帶手電筒
- 想上去影日落或者夜景嘅朋友，記得提早去搵個靚位
睇完介紹，係咪都覺得紅香爐峰簡單易行呢？呢個週末，記得帶埋屋企人、朋友、或者另一半一齊去啦！
你可能會感興趣嘅文章：