端午節又嚟喇！每年呢個時候，街市同超市都會開始有大大包糭賣，
唔止傳統口味，仲有咩XO醬糭、咖喱糭、素糭、甜糭等等，啱晒唔同人口味。
不過無論你係買返嚟食，定係自己屋企親手包糭，最重要一樣嘢就係——蒸得啱時間。
你知啦，蒸糭唔似即食麵咁簡單，蒸唔夠會又硬又未熟，
蒸過龍又會飯身腍晒冇晒口感，咁就浪費心機同糯米啦。
所以今次 ReUbird 小編就想同大家分享下蒸糭時間點樣掌握得準，加埋幾個翻熱貼士，
仲會解釋埋鹹肉糭同鹼水糭有咩唔同，同介紹一啲今年端午節有特色，又好食嘅商戶俾你，
等你端午節唔洗盲蒸亂食，可以一次過搞掂晒成家人嘅味蕾！
端午節糭
蒸糭時間
講蒸糭，首先你要分清楚你隻糭係新鮮糭定冷藏糭。
（圖片來源：生活易）
新鮮糭
如果你係自己包，或者街市啱啱買返嚟嗰啲未雪過，屬於新鮮糭，
一般嚟講，放落蒸鍋用大火蒸45分鐘至1個鐘頭左右就差唔多。
（圖片來源：HKTB)
不過蒸嘅時間都要睇下糭嘅size同厚度，如果你包得好紮實，餡料又多，又大隻嘅話，
咁就建議你蒸成個鐘至一個半鐘都唔出奇，確保入面都熱晒冇生米味。
（圖片來源：HK01)
急凍糭
如果你係買啲超市冷藏裝，特別係急凍糭，就要預蒸至少90分鐘先會熟透。
唔少人以為叮個幾分鐘就得，結果啲飯又唔熟、餡仲凍冰冰——咁樣食落真係掃晒興。
（圖片來源：成隆行)
所以正確做法係唔好貪快，一定用蒸鍋慢慢嚟。
如果驚蒸唔均勻，中途可以反轉吓隻糭，或者用筷子輕輕𠝹落去睇吓中間熱未。
翻熱糭方法
再嚟講吓翻熱糭嘅方法。
就算係即日食，都未必人人啱啱蒸完就食，特別係而家啲人放工先食晚飯，
又或者買咗幾隻預留幾日慢慢食。如果糭擺咗入雪櫃，要翻熱，
千祈唔好直接用微波爐叮住成隻糭連埋葉，咁樣唔單止會令葉燶，
入面啲糯米仲好容易加熱唔均，外熱內凍。最穩陣又原汁原味嘅做法，係再次放入蒸鍋用大火蒸返。
（圖片來源：COMFEE)
如果你係雪櫃冷藏嗰啲（唔係冷凍），蒸30至45分鐘就夠；
如果係冷凍糭，建議你預早拎出嚟解凍一至兩個鐘，再蒸會比較平均。
如果真係趕時間，可以拎隻糭落水浸15至20分鐘，加快解凍過程，然後放落蒸鍋再蒸。
（圖片來源：施正行上海糭子店)
至於鹼水糭就簡單啲，因為冇餡，一般翻熱蒸15至20分鐘左右就搞掂，
重點係唔好蒸到飯變「溶溶哋」，咁就唔煙韌啦！
鹹肉糭，鹼水糭分別
講到咁耐，唔講唔知，原來唔少人到依家都未搞清楚鹹肉糭同鹼水糭嘅分別，
有啲人仲會問：「鹼水糭係咪冇味嘅？」咁就未必嘅。
簡單啲分法，鹹肉糭通常係傳統南方糭，最經典就係入面有五花腩、鹹蛋黃、綠豆、瑤柱、蝦米、栗子等等，
材料豐富到一啖落去可以咬到三四樣唔同質感，真係又香又有層次感，啱晒鍾意食濃味重口味嘅人。
而且鹹肉糭嘅糯米通常會預先撈油、撈醬油，蒸完成隻糭色澤金黃，咬開仲見到油香四溢，係唔少人心目中嘅童年味道。
相反，鹼水糭就係屬於甜口糭嘅類型，最大特色就係用鹼水浸過嘅糯米，顏色帶少少黃，飯身煙韌又滑溜，冇餡料，
食落去帶微微鹼香，一般會配搭黃糖、片糖漿、花生糖漿一齊食，口感清新，特別啱夏天冇咁膩。
而鹼水糭最出名嘅版本就係香港或者廣東人鍾意食嘅碌柚葉鹼水糭，蒸出嚟有柚葉香氣，係另一種淡淡的幸福味道。
2026最新端午節糭推介
端午節糭推介｜1. 翠亨邨：特級元貝八寶裹蒸糭、金腿花生鹹肉糭
講起老字號粵菜，超過45年歷史、連米芝蓮都推介嘅翠亨邨今年都玩埋端午糭市場，推出咗4款自家製特色糭，款款足料、品質有保證！鹹糭方面有三款，分別係：「特級元貝八寶裹蒸糭」、「金腿花生鹹肉糭」同埋「養生珍珠如意糭」，甜糭就有一款叫「黃金柑桔鹼水糭」，啱晒唔同口味嘅朋友。
如果你係選擇困難症，佢哋都準備咗套裝幫你搞掂，今年大熱推介係「四囍臨門」端陽糭套裝，一次過試齊四款唔同口味，送禮自奉都一流。即日起至6月17號，經指定網站落單仲有低至七折優惠，最平一隻糭只需$105，真係抵到爛！
介紹返幾隻靚糭先～「特級元貝八寶糭」用足大粒瑤柱、材料豐富，咬落鹹香夠晒滋味；「金腿花生糭」就係選用金華火腿，火香入味，連花生都煮到腍糯唔爛；比較特別嗰隻「養生珍菌竹笙淮山糭」就用咗雲南嘅珍貴菇菌——羊肚菌同黃耳，成隻糭都充滿菇香，好有層次感。
甜糭方面，呢隻「黃金柑桔糭」用糖漬柑桔加自家製柑桔茸整成，香甜中帶陣陣果香，食完清新解膩，夏天食一流！
端午節糭推介 - 翠亨邨
價錢及預訂詳情：翠亨邨（按此預訂即享優惠）
自取日期：2025年6月3日至6月17日
自取地址：
- 尖沙咀店：
- 地址：九龍尖沙咀彌敦道132號美麗華廣場一期5樓
- 營業時間：星期一至日 12:00 - 21:00
- 中環店：
- 地址：香港中環皇后大道中16-18號新世界大廈2樓
- 營業時間：星期一至日 12:00 - 21:00
端午節糭推介｜2. 翠園：原隻鮑魚鹹肉糉、燒鴨鹹肉糉、翠園帶子蝦乾糉
翠園每年端午節糭都好有水準，今年款式同樣夠豐富，由矜貴鮑魚、惹味燒鴨到清新甜糉都有齊，無論自食定送禮都好適合。
即日起上指定網站預訂仲可以享有低至75折優惠！
必試之選一定係燒鴨鹹肉糭，用咗翠園自家嘅招牌燒鴨加上鹹香肉餡，蒸完成隻糭鴨香撲鼻，鹹香味爆燈，加埋糯米油潤濕潤，一啖落去真係齒頰留香～鍾意食鴨嘅朋友一定唔會失望。
原隻鮑魚鹹肉糉選用原隻福建鮑魚，經蒸煮及爆炒等多重工序炮製，鮑魚口感軟嫩入味，再配搭鹹肉同鹹蛋黃，鮮味層層堆疊，食落特別滿足。
鍾意海鮮嘅可以揀帶子蝦乾糭，整粒帶子加蝦乾釀入去，啲鮮味直情滲晒落軟綿糯米入面，食落層次感十足，香味濃郁到冇得輸。
素食選擇方面有素舞茸羊肚菌糉，以糯米配搭麥米、燕麥米及紫糯米，再加入羊肚菌、冬菇及舞茸菌，菇香濃郁，口感更有層次。
甜糉推薦陳皮豆沙鹼水糉，用新會陳皮製成紅豆沙，帶淡淡清香，配上鹼水糉的微甜，味道清新唔膩。
端午節糭推介 - 翠園
價錢及預訂詳情：翠園（按此預訂即享優惠）
自取地址：各大香港美心中菜分店
端午節糭推介｜3. 東海堂：北海道元貝黑豚肉糭、十勝紅豆栗子糭
鍾意食日料嘅你今年端午節有福啦！東海堂精挑細選咗上乘日本食材，推出咗3款充滿和風嘅端午糭，每款都滲透住日式味道，夠晒特別！由即日起上指定網站預訂，仲有低至75折優惠，抵食又有新鮮感，唔試下都對唔住自己啦～
當中人氣之選一定係「北海道元貝黑豚肉糭」，用咗來自鹿兒島嘅黑豚肉，肉質嫩滑又夠香，加埋北海道原粒瑤柱（元貝），一咬落去滿口鮮味，香氣同油潤感爆燈，真係有種幸福嘅感覺湧晒上嚟！
鍾意食甜糭就唔好錯過「十勝紅豆栗子糭」，用咗北海道十勝紅豆整成嘅綿密豆沙，豆香濃郁，口感超滑，加埋甘香栗子一齊入口，煙韌又香甜，仲有糭葉淡淡香氣，食落層次分明，甜而不膩，食完心情都靚晒～
端午節糭推介 - 東海堂
價錢及預訂詳情：東海堂（按此預訂即享優惠）
自取日期：2026年6月1日至6月16日
端午節糭推介｜4. 美心：原粒瑤柱裹蒸糭、一品家鄉糭
今年端午節美心誠意十足，推出咗6款唔同款式嘅端午糭，當中有4款鹹糭同2款甜糭，選擇夠晒多，口味夠晒包羅萬有！最正係價錢都好親民，上指定網站預訂即享低至75折，$314起就歎到4隻糭，鹹甜都有齊，抵食又有質素！
重口味之選一定要試佢哋嘅原粒瑤柱裹蒸糭，足足用咗大粒日本原粒瑤柱，仲有燒鴨、腩肉、鹹蛋黃、花菇、蓮子、甘栗，全部材料都係真材實料，仲加咗香滑綠豆同軟糯糯米包住，啖啖餡料超滿足，食完真係心都暖埋。
如果你掛住屋企人煮糭嘅味道，咁就要試吓呢隻「一品家鄉糭」！材料簡單但夠味，用滷水醃製嘅腩肉，加埋燒鴨、陳皮、原隻鹹蛋黃，再混埋綠豆、蓮子，味道香濃有層次，入口煙韌實在，食完好有懷舊風味。
今年仲有新搞作——全新推出「美心玲瓏四式糭禮盒」，一盒入面有XO醬瑤柱滷肉糭、黑毛豬蛋黃糭、紅藜麥粟米滷肉糭，同埋藜麥蜜棗糭各一隻，鹹甜平衡、健康有營，仲配咗精緻靚盒，送禮夠哂得體又大方，送比親戚朋友都夠晒體面！
端午節糭推介 - 美心
價錢及預訂詳情：美心（按此預訂即享優惠）
自取地址：按此查看自取詳情
自取日期：2026年6月1日至6月16日
端午節糭推介｜5. 新同樂：鮑魚狀元裹蒸糭、西班牙黑毛豬瑤柱金腿醬油蛋黃糭
想過一個高質又有品味嘅端午節？不如睇吓新同樂今年推出嘅端午節糭！呢間由袁氏家族創辦、榮獲米芝蓮二星嘅老牌粵菜館，一直都係老饕心水之選，四十幾年嚟專攻頂級粵菜，質素有保證！
今年端午，新同樂一口氣帶嚟3款矜貴糭禮盒，全部用料一樣唔講得笑，啱晒送禮或者自己食都夠晒講究。
首推一定係「鮑魚狀元裹蒸糭」，一聽個名就知係皇牌級別，鮑魚加上大大粒瑤柱、鹹蛋黃、五花腩，餡料飽滿，糯米香口彈牙，食完齒頰留香。
仲有呢款「西班牙黑毛豬瑤柱金腿醬油蛋黃糭」，聽個名都知係重量級組合，用上高質西班牙黑毛豬，配合金華火腿、瑤柱同鹹蛋黃，再加少少香濃醬油味，味道層次超豐富，好有驚喜。
鍾意甜糭嘅朋友就要試吓「栗子茸鮮栗子鹼水糭」或者「五豆紫米糭」，甜而不膩，食落口感煙韌又健康，仲帶住陣陣糭葉香味。
當中有兩款禮盒仲配埋迷你XO醬，鹹香惹味，一開嚟拌飯拌麵都一流，送禮又大方又實用。
而家上指定網站預訂都有優惠，想買嚟孝敬屋企人、拜年送禮都好啱手，今個端午就選個有星級認證嘅滋味啦！
端午節糭推介 - 新同樂
價錢及預訂詳情：新同樂（按此預訂即享優惠）
自取地址：尖沙咀彌敦道132號美麗華廣場一期4樓401號舖
自取日期： 2026年5月25至6月18日
端午節糭推介｜6. 香港W酒店 - 星宴中餐廳：蛋黃豚肉糉、陳皮豆沙鹼水糭
想揀高級少少又夠體面嘅端午節禮盒，可以留意香港W酒店推出嘅糭子系列，走精緻路線之餘，仲配埋人氣XO醬，送禮特別有心思。
至尊糭子禮盒集合鹹甜兩款口味，包括瑤柱豚肉糉同陳皮桂花豆沙鹼水糉，各一隻（約200克），再配一樽香港W酒店XO醬（約190克），一次過試齊鹹香同清甜滋味，配搭夠晒高級。
瑤柱豚肉糉用料講究，瑤柱鮮味突出，配上豚肉令口感更豐富，整體味道濃郁但唔會過膩，而陳皮桂花豆沙鹼水糉則走清新路線，桂花香氣配搭陳皮豆沙，甜而不膩，帶少少花香層次。
如果你想送俾人，又想有啲排面，咁W酒店「至尊糭子禮盒」就啱晒你，送親朋好友或者公司客戶都夠晒得體！
而家仲有快閃優惠！由即日起上指定網站預訂糭或者糉情享樂套裝，低至買二送二，係真心抵食！想過一個有style、有品味嘅端午節，今年一定要睇吓W酒店呢款星級之選！
端午節糭推介 - 香港W酒店
價錢及預訂詳情：香港W酒店（按此預訂即享優惠）
自取地址：尖沙咀柯士甸道西1號港鐵九龍站香港W酒店1樓
自取時間：星期一至星期日 11:00-19:30
自取日期：2026年6月12日至6月19日
端午節糭推介｜7. 帝苑酒店：原隻鮑魚瑤柱裹蒸糭、鹿兒島黑豚肉蛋黃櫻花蝦糭
想過一個有格調嘅端午節？咁一定要睇吓尖沙咀帝苑酒店今年推出嘅4款全新口味星級糭！全部都係用上矜貴食材，無論送禮定自己歎都夠晒有面子～而家經指定網站預訂仲有低至8折優惠，記得把握機會喇！
鹹糭方面款款都夠哂誠意：
-
「原隻鮑魚瑤柱裹蒸糭」夠晒大氣，用原隻鮑魚同日本瑤柱入饌，香濃鮮味，齒頰留香。
-
「鹿兒島黑豚肉蛋黃櫻花蝦糭」夠晒特色，用上肉味香濃嘅黑豚肉，再加櫻花蝦、鹹蛋黃，一啖落去口感豐富。
-
「金腿蛋黃鹹肉糭」就走經典路線，鹹香油潤，啱晒中意傳統味道嘅你。
甜糭都有驚喜！「桂花豆沙糭」用咗滑到溶嘅豆沙餡，仲滲透住陣陣桂花香，軟綿綿咁又唔會太甜，一啖接一啖都唔覺撐。
如果你又想食鹹又想歎甜，可以揀佢哋嘅「節慶龍舟糭組合」，入面有「金腿蛋黃鹹肉糉」同「桂花豆沙糉」各一隻，一套滿足兩個願望，CP值超高！
即日起經指定網站上預訂即享高達8折優惠，仲唔快啲落單買返幾隻？
端午節糭推介 - 帝苑酒店
價錢及預訂詳情：帝苑酒店（按此預訂即享優惠）
自取地點：
1）帝苑酒店大堂節日專櫃
- 地址：香港九龍尖沙咀東部麽地道69號
- 開放時間：星期一至日及公眾假期 11:00 - 20:00
2）期間限定店取貨 - 國際金融中心
- 地址：中環IFC 國際金融中心壹期 壹樓LA7鋪
- 開放時間：星期一至五 12:00 - 20:00 / 星期六、日及公眾假期 12:00 - 19:30
自取日期：2026年6月4日至6月16日
端午節糭推介｜8. 一粥麵：端陽獻禮端午糭套裝+送$40電子優惠券
人氣中式餐飲專門店一粥麵今年推出「端陽獻禮端午糭套裝」，一次過讓你試齊4款人氣端午糭，包括香濃嘅金華火腿糭、味道豐富嘅五香鹹肉糭、帶有淡淡桂花香嘅黑糯米豆沙糭同綿密細滑嘅蓮蓉鹼水糭，無論鹹甜都齊晒，啱哂一家大細齊齊大快朵頤。
金華火腿糭用上上等金華火腿同鹹蛋黃，加埋豬腩肉、花生同黑豆，味道鮮香濃郁；五香鹹肉糭配料豐富，鹹蛋黃配原隻豬肉，再加入五香粉調味，層次感十足。甜糭方面，黑糯米豆沙糭煙韌軟糯，帶陣桂花香氣；蓮蓉鹼水糭甜而不膩，好啱大人細路口味。
仲有好消息，即日起經指定網站預訂端午糭套裝即送總值逾$40電子優惠券，包括皇牌椰汁喳咋、紅豆冰、HK$5優惠券同滋補養生湯包HK$5優惠券，性價比超高，快啲去訂啦！
端午節糭推介 - 一粥麵
價錢及預訂詳情：一粥麵（按此預訂即享優惠）
自取地址：
- 2026年6月1日至6月15日期間，可憑QR Code到一粥麵全線分店 (機場、香港站、青衣長發、屯門醫院分店除外) 換領
- 2026年6月16日至6月21日期間，只可到以下指定分店領取：
- 柴灣新翠花園分店、樂富廣場分店、美孚曼坊分店、將軍澳都會駅分店、屯門錦薈坊分店、馬鞍山新港城分店及上水彩園廣場分店。
- *由於此期間貨量有限，請於到店換領前與分店查詢（分店電話）
端午節糭推介｜9. 香港麗思卡爾頓酒店：豪華裹蒸糭禮盒、至尊甜糭禮盒
想揀高端路線嘅端午節禮盒，香港麗思卡爾頓酒店嘅出品一向有保證，今年同樣主打精緻同矜貴感，適合送禮或者節日享受。
豪華裹蒸糭禮盒主打經典升級版鮑魚瑤柱裹蒸糭，用料相當講究，集合鮑魚同瑤柱等高級食材，味道濃郁之餘層次豐富，屬於傳統裹蒸糭中嘅豪華版本，份量同口感都夠紮實。
甜糉方面有至尊甜糭禮盒，包括鹼水蓮蓉糭同陳皮豆沙鹼水糭，一款口感細滑香甜，一款帶淡淡陳皮清香，整體味道清新不膩，適合食完鹹糉之後平衡口味。
端午節糭推介 - 香港麗思卡爾頓酒店
價錢及預訂詳情：香港麗思卡爾頓酒店（按此預訂即享優惠）
自取地址：香港麗思卡爾頓酒店9樓大堂
自取時間：星期一至星期日 12:00-20:00
自取日期：2026年6月12日至6月18日
端午節糭推介｜10. 香港嘉里酒店：香格里拉海鮮粽三重奏
想試下以海鮮為主打嘅端午糭，香港嘉里酒店推出嘅香格里拉端午雅饌海鮮粽三重奏就相當吸引，集合三款矜貴海味配搭，適合鍾意重料同層次感嘅食家。
套裝包括三款不同風味：青龍蝦瑤柱粽、鮑魚瀨尿蝦海鮮粽，以及黑松露雲腿蜜餞金蠔粽，每款用料都相當講究，將多款高級食材結合，味道豐富而且層次分明。
糯米選用優質材料，再配搭各款海味及鹹香餡料，以傳統手工包製並用竹葉包裹，蒸煮後香氣特別濃郁，每一啖都食到海鮮嘅鮮甜同油香。
除咗自取，亦有提供送遞服務。
端午節糭推介 - 香港嘉里酒店
價錢及預訂詳情：嘉里酒店（按此預訂即享優惠）
自取地址：香港嘉里酒店一樓節日專櫃：香港九龍紅磡灣紅鸞道38號酒店大堂節日專櫃
自取時間：星期一至星期日 11:00-20:00
自取日期：2026年6月13日至6月16日
端午節糭推介｜11. 香港半島酒店：金腿乾鮑裹蒸糭、瑤柱裹蒸糭、金黃鴛鴦鹼水糭
講到高級中菜糭，香港半島酒店嘉麟樓一向都係指標級選擇。
今年由米芝連星級團隊主理，推出多款精品糭子同手工醬料，無論用料定製作都相當講究，送禮自用都夠晒體面。
金腿乾鮑裹蒸糭屬於矜貴代表作，以鮑魚汁為糯米調味，加入原隻30頭中東乾鮑、金華火腿同瑤柱等上乘食材，整體味道濃郁豐腴，每一啖都食到層次感。
瑤柱裹蒸糭則走經典路線，糯米包裹住以玫瑰露醃製嘅匈牙利豬肉，再配上瑤柱，香氣突出又帶甘香，是不少人每年必食之選。
甜糉方面有金黃鴛鴦鹼水糭，一次過可以試到陳皮紅豆同蓮蓉兩款口味，口感軟糯、甜而不膩，味道清新，作為飯後甜點一流。
另外，嘉麟樓亦推出自家手工醬料，包括XO辣椒醬、四川風味辣椒醬同潮式辣椒醬，配搭糭子食可以再提升風味。當中端陽禮盒更會將金腿乾鮑裹蒸糭同秘製XO辣椒醬一同搭配，層次更豐富。
端午節糭推介 - 香港半島酒店
價錢及預訂詳情：香港半島酒店（按此預訂即享優惠）
自取地址：尖沙咀中間道18號半島酒店辦公大樓6樓漢口廳1
自取時間：星期一至星期日 11:00-20:00
自取日期：2026年6月6日至6月19日
端午節糭推介｜12. 香港康得思酒店：鮑珍瑤參裹蒸糭、雲南羊肚菌小米養生素糭
香港康得思酒店嘅端午糭系列一向有口碑，今年推出嘅明閣臻藏糭子系列同樣走高質路線，由傳統豪華裹蒸糭到養生素糭都有照顧到。
鮑珍瑤參裹蒸糭屬於重量級之選，用料相當豐富，結合鮑魚、瑤柱及海參等矜貴食材，糯米吸收精華後味道濃郁飽滿，份量十足，適合多人分享或者節日聚餐享用。
另一款雲南羊肚菌小米養生素糭則主打健康路線，以羊肚菌配搭小米等食材，口感清新之餘亦帶有自然菇香，適合想食得清淡啲或者素食人士。
端午節糭推介 - 香港康得思酒店
價錢及預訂詳情：香港康得思酒店（按此預訂即享優惠）
自取地址：香港九龍旺角上海街 555 號，香港康得思酒店6樓
自取時間：星期一至星期日 11:00-21:00
自取日期：2026年6月1日至6月19日
端午節糭推介｜13. 九龍香格里拉：香格里拉端午雅饌海鮮粽三重奏
九龍香格里拉米芝連一星食府「香宮」今年端午節同樣帶來多款高質糭子選擇，由傳統裹蒸糭到矜貴海鮮粽都有，款式相當齊全，加上低至85折優惠。
主打推介之一是香格里拉端午雅饌海鮮粽三重奏，集合三款高級海鮮口味：青龍蝦瑤柱粽、鮑魚瀨尿蝦海鮮粽，以及黑松露雲腿蜜餞金蠔粽。每款都用上優質糯米配搭矜貴食材，層次豐富，鮮味突出，適合想一次試多款特色口味的人。
經典款方面有香宮鮑魚裹蒸粽，用料包括鮑魚、瑤柱及豬肉，味道濃郁而且餡料豐富，係傳統派之選。
香宮瑤柱裹蒸粽則加入瑤柱、豬腩肉及鹹蛋黃，配方經多年打磨，味道穩定又有水準。
甜糭方面有香宮蓮蓉梘水粽同香宮三十年陳皮豆沙粽。
前者蓮蓉幼滑，甜味清雅；後者加入三十年陳皮，豆沙香中帶陳皮清香，味道更有層次，甜而不膩。
想食得更特別，可以試香宮羊肚菌如意野菌五穀竹筒粽，以羊肚菌、野菌同五穀炮製，走健康路線之餘，菌香亦相當突出。
而香宮潮州風味竹筒粽就主打潮州口味，風味較濃，適合鍾意鹹香口感嘅朋友。
另外，香宮亦有兩款清真口味選擇，包括清真榴槤粽同清真巴東牛肉粽，前者主打濃郁榴槤香，後者則以巴東牛肉入饌，為端午糭帶來更少見嘅風味組合。
端午節糭推介 - 九龍香格里拉
價錢及預訂詳情：九龍香格里拉（按此預訂即享優惠）
自取地址：香港九龍尖沙咀東麼地道64號酒店大堂節日專櫃
自取時間：星期一至星期日 10:00-22:00
自取日期：2026年6月4日至6月16日
端午節糭推介｜14. 鴻福堂：原隻鮑魚瑤柱豚肉裹蒸糭、黑松露金腿瑤柱冬菇豚肉糭
鴻福堂今年端午節糭款選擇都幾多，比較貼地同實食路線，由傳統裹蒸糭到養生素糭都有，適合唔同口味需要，早鳥優惠低至75折。
原隻鮑魚瑤柱豚肉裹蒸糭係較矜貴嘅一款，加入原隻鮑魚、瑤柱同豚肉，餡料豐富，食落夠晒滿足。
想試少少新意，可以揀黑松露金腿瑤柱冬菇豚肉糭，黑松露香氣加上金腿同瑤柱，味道會再濃郁啲，適合鍾意香口糭嘅朋友。
傳統風味方面有中山蘆兜糭，屬於較經典嘅選擇；甜糭則有陳皮豆沙蓮子百合梘水糭，甜而不膩，帶少少陳皮清香。
如果想食得健康啲，可以考慮養生五穀豚肉糭或者牛肝菌姬松茸素糭，一款走五穀養生路線，一款就主打菇菌香氣，清淡得來都有層次。
另外仲有梅菜五花肉紹興糭，梅菜香氣配上五花肉同紹興酒風味，屬於較惹味嘅口味之一，適合鍾意重口味糭子嘅人。
端午節糭推介 - 鴻福堂
價錢及預訂詳情：鴻福堂（按此預訂即享優惠）
自取地址：換領詳情
自取日期：2026年6月8日至6月14日
講咁耐都係想講句，端午節一年得一次，梗係要蒸個好糭、食個好糭啦！
無論你係糭界老手定係第一次自己落手整糭，只要掌握好蒸糭時間同翻熱貼士，就算買現成嘅返屋企翻蒸，都一樣食得出原汁原味。
而今時今日嘅鹹肉糭同鹼水糭選擇多到眼都花，傳統口味、創新配搭、高級酒店手工款乜都有，總有一隻糭啱你心水。
想送禮體面、又想自己歎得開心啲，就記得早啲落單，唔好等到端午節前最後一刻先嚟搶貨，到時驚係連糯米香都聞唔到啦～
快啲揀定你今年嘅心頭好，開心過個香噴噴又有糉意嘅端午節啦！