香港夏天咁熱，就梗係要去沙灘消下暑、出海玩下水上活動啦！其實香港仲有唔少有靚景靚水質嘅沙灘㗎，想知係邊就繼續睇埋落去啦！
| 靚景沙灘精選 | BBQ沙灘精選 |
1. 靚沙靚景精選
淺水灣
淺水灣出名水清沙幼，依個沙灘被稱為香港最靚嘅沙灘，所以每年都吸引唔少市民同遊客慕名而來～
淺水灣沙灘被打造成海水浴場，所以各種設施一應俱全。有齊淋浴設施、更衣室等，附近仲有遊樂場和沙灘排球場，同時附近又有淺水灣酒店，想同朋友係香港 Staycation又得，望住個沙灘享受夠先返市區啦～
地址：淺水灣海灘道（顯示地圖）
交通：從港鐵香港站D出口，步行至中環交易廣場巴士總站後，搭乘6、6A、6X、66或 260號巴士，於淺水灣落車
設施：更衣室、淋浴設備、洗手間、浮台、遊樂場和沙灘排球場
查詢：2812 2483
愉景灣
愉景灣位於東涌附近，由欣澳或者東涌入去只需15-30分鐘，非常方便和接近市區。雖然依到嘅沙灘係人造沙灘，但依到嘅沙細而滑，玩沙一流，假日仲會見到有人係到打沙灘排球，可以主動啲問下可唔可以一齊打㗎！但要注意，愉景灣泳灘為非刊憲泳灘，無防鯊網，所以建議係返岸上面玩沙～。
地址：愉景灣海馬徑旁（顯示地圖）
交通：中環碼頭有24小時渡輪服務往返愉景灣
穿梭巴士班次
DB03P - 往返愉景北商場及欣澳港鐵站
DB01R - 由愉景灣遊艇徑往返東涌臨時巴士總站，途經愉景灣臨時巴士總站
時間表：按此查閱
設施：更衣室、淋浴設備和洗手間
查詢：2980 2674、2852 3220
長洲觀音灣泳灘
長洲觀音灣泳灘的水質一直都幾好，而且長洲一直都係渡假勝地，唔少香港人都會入去住返一兩天，遠離下市區！
觀音灣的水上活動中心仲可以租借風帆、獨木舟同其他水上滑浪設備，適合鐘意夏天玩水嘅你！
地址：長洲黑排路 （顯示地圖）
交通：從中環5號碼頭乘渡輪前往長洲渡輪碼頭，船程約35至60分鐘，上岸後經東灣路走約10分鐘，從東灣泳灘向長洲華威酒店方向走約5分鐘。
設施：小食亭、更衣室、淋浴設備、洗手間和浮台
查詢：2981 8472，2852 3220
2. BBQ沙灘精選
銀礦灣泳灘
銀礦灣泳灘位於梅窩，係適合一家大細嘅香港海邊好去處。梅窩的交通非常方便，附近仲有唔少餐廳，間中有市集擺檔，適合一家大細或者情侶去個到放鬆下。
好多人都鍾意得閒黎游下水，曬下日光浴，或者成班朋友黎打沙灘排球。海灘附近仲有銀礦灣瀑布公園，係春季賞花嘅好地方，唔少人都慕名而來黎賞花，度過悠閒又放鬆嘅一日。
地址：離島大嶼山梅窩東灣頭路（顯示地圖）
交通：從中環6號碼頭搭乘渡輪前往梅窩，船程約35至55分鐘。上岸後右轉往梅窩碼頭路，然後沿銀礦灣路，右轉至銀石街，再步行到東灣頭路，即見到銀礦灣泳灘。
設施：燒烤爐(24個)、更衣室、淋浴設備、洗手間和沙灘排球場餐廳、
查詢：2984 8229，2852 3220
貝澳泳灘
貝澳泳灘係貝澳出名嘅海灘，位於西南偏南，依到可以睇到極美嘅日落。海灘旁邊就係貝澳營地，免費開放俾公眾使用。游完水之後，再係海邊露營、BBQ，一邊欣賞黃昏景色，真係好寫意同開心！
地址：貝澳（顯示地圖）
交通：從中環6號碼頭搭乘渡輪前往梅窩，船程約35至55分鐘；上岸後於梅窩碼頭前的巴士總站，搭乘1號巴士於貝澳下車，車程約15分鐘。
設施：燒烤爐(6個)、更衣室、淋浴設備和洗手間
查詢：2984 7675
大浪灣泳灘
石澳大浪灣泳灘係一年四季都風高浪急，成為左香港著名嘅滑浪熱點。大浪灣泳灘仲可以燒烤！唔想BBQ嘅你可以係海灘附近嘅茶座一邊觀浪、一邊享受美食，諗下都興奮！
地址：石澳大浪灣道（顯示地圖）
交通：從港鐵筲箕灣站A3出口搭乘9號巴士至大浪灣。
設施：燒烤爐(20個)、更衣室、淋浴設備
查詢：2809 4558
赤柱正灘泳灘
赤柱正灘位於赤柱市集附近，好容易去到。沙灘附近，有士多、餐廳等，係餐廳到望住個沙灘都幾享受㗎！
赤柱有水上活動中心，有唔少人都喜歡在這裡玩獨木舟、滑浪風帆等，玩住水睇住個靚景真係好正！
地址：赤柱赤柱灘道 （顯示地圖）
交通：
於港鐵香港站D出口步行至中環交易廣場巴士總站，搭乘6、6A、6X、66或260號巴士，於赤柱廣場或赤柱村站下車。
於尖沙咀廣東道的新港中心外，搭乘973號巴士，於赤柱廣場下車。
於港鐵銅鑼灣站F1出口步往渣甸街，搭乘40號綠色小巴，於赤柱市集下車。
設施：燒烤爐(15個)、浮台、更衣室、淋浴設備、洗手間
查詢：2813 0217
想睇更多關於香港嘅資訊，歡迎㩒入 ReUbird ～