【城門水塘】漫遊白千層 壯觀的水壩 | 城門水塘郊遊路線

講起城門水塘，相信大家並不陌生。無論係郊遊、燒烤、影相或者行山，都可以選擇城門水塘。加上交通方便，自然地城門水塘就成為左一眾香港人嘅郊遊好去處。於是小編就決定今日同大家介紹下城門水塘有咩玩～

城門水塘資訊

位置：香港新界西南部的一個水塘，位於荃灣區城門谷一帶（城門郊野公園）。

路線：城門道 -->  白千層樹林 -->城門水塘水壩 -->城門道

路程 ：8.5公里

需時 ：3小時

難度 ：初級路線

城門水塘交通

1. 荃灣出發：綠色小巴82號 (荃灣川龍街總站，直達城門水塘)

2. 沙田大埔出發：巴士73X、40X、47X或48X，於可風中學落車。沿城門道入。(到城門小巴站1公里)

城門水塘路線

第一站：城門道

落車之後，就會見到呢個小巴總站，旁邊係小食亭同埋洗手間。整理好裝備之後就可以踏上石級正式起步。

沿樓梯而上，就會見到一個遊客中心，入面有城門水塘嘅簡介資料，包括城門水塘名字由來，附近山頭嘅前軍事設備等等，如果對呢啲有興趣，就可以入去參觀一下。

第二站： 白千層樹林

首先進入嘅係菠蘿壩自然教育徑，條路平緩易行，但要注意嘅係呢度有好多馬騮出沒，呢度嘅馬騮會搶路人嘅食物，所以記住要收埋啲食物，唔好俾佢地見到。

行行下，就會轉上石屎路，再行多一陣就到達城門水塘好出名嘅白千層樹林啦！樹林入面風景開掦，水塘入面仲有魚仔游動，微風輕輕吹過，好似置身於世外桃源。

白千層樹林都算大，呢度唔單止有一片好大嘅草地，仲有廣闊嘅湖畔，吸引唔小釣魚人士前來垂釣，同時都吸引唔少新人嚟呢度拍婚紗相。 無論你係鍾意係咁樣嘅美景下靜靜地坐上一日，或者係鍾意影相打卡嘅人，白千層樹林都十分適合哦！

第三站：城門水塘水壩

欣賞完美景，下一站就係約5公里城門水塘主壩，中途並無特別景觀參觀。如果只係郊遊嘅話，建議從原路返回小巴站；如果想參觀水壩，就要有心理準備要行多幾個鐘頭先可以到達，之後再行多45分鐘先到達小巴站。

圖入面嘅山徑係衛奕信徑第七段，只要跟住指示牌一直行便可。山徑多數都係平路，行到山徑尾便可以見到城門水塘主壩。水壩十分壯觀，聲響都非常澎拜。

第三站：返回菠蘿壩小巴站

觀賞完氣勢磅礴嘅城門水壩，就要離開嚕~ 離開嘅途中會經過燒烤場，呢度有洗手間、汽水機，有需要嘅話可以係呢度休息一下。最後，沿著車路繼續行，大約半個鐘後邊到達菠蘿壩小巴站，結束本次郊野行程。

注意事項

1. 城門水塘附近一帶有馬騮出沒，要提防牠們或會搶走大家手挽的食物袋，請不要在牠們面前進食及切勿餵飼馬騮。

2. 雨季或雨後，水塘水位較滿時才可拍攝到白千層湖中倒影

3. 水塘堤岸有淤泥濕滑，小心跌入水中

4. 路途比較漫長，天氣炎熱時建議帶定充足的水

城門水塘有好多玩法，適合唔同人士。今次小編同大家介紹的就係最hea最輕鬆、老少咸宜嘅路線。唔知大家今個週末又有冇plan定去城門水塘郊遊下呢！