×
登入 註冊

聯絡我們 關於我們
×
登入 註冊

聯絡我們 關於我們
×
 Hong Kong hk 香港 玩樂雜誌 【南丫島一日遊】最詳盡的南丫島交通、景點、美食攻略
ReUbird 活動雜誌   #拍拖好去處 #影相好去處 #親子好去處 #週末好去處 #美食 #郊遊
【南丫島一日遊】最詳盡的南丫島交通、景點、美食攻略

等小編同你一齊規劃南丫島一日遊啦!


by Kayan

📷Travel |🐾Photography


出街玩想要新靈感?
全港18區好玩好食好去處推介,盡在ReUbird!

假期想遠離市區去下離島,但又唔想行太遠,南丫島絕對係一個好好的選擇。由中環碼頭去到南丫島只需半個鐘時間,加上南丫島又有美食、沙灘同靚景,絕對係假期好去處。等小編同你一齊規劃南丫島一日遊啦!


南丫島地點及交通

南丫島係香港第四大島嶼,屬於離島區。大家去到中環四號碼頭,就可以乘搭渡輪到達南丫島。




因為南丫島面積比較大,所以大家到達碼頭後,會見到兩個唔同的目的地,一個係南丫島索罟灣,而另一個係南丫島榕樹灣,咁究竟要在邊度落船呢?其實兩個目的地比人的感覺都截然不同。而大部分想輕鬆郊遊的人都會選擇榕樹灣落船,因為比較熱鬧,而索罟灣就比較寧靜。兩個地方雖相通,但中間要行大約2小時山先可以到達另一邊。

渡輪船期及費用:
中環⇄南丫島榕樹灣
中環⇄南丫島索罟灣


南丫島遊玩路線A:悠閒輕鬆路線

經過剛剛的介紹,大家都知道南丫島好大,所以都有唔同方法玩轉南丫島。如果你係想輕輕鬆鬆睇下風景,睇下當地特色舖頭,咁以下的南丫島路線就適合不過啦!

第1站:榕樹灣大街

於榕樹灣落船,上岸後向右行大約2分鐘,就會到達南丫島熱鬧的榕樹灣大街。



呢度有唔少外國人居住,所以街上都有唔少風味唔同的餐廳,無論係西式餐廳,cafe或者係海鮮餐廳都可以搵到,在參觀南丫島之前都可以搵一間餐廳坐低補充能量!



食完飯,梗係要繼續出發啦!而呢條街上面都有數間小店,包括貓貓擺設、民族雜貨,價錢都親民~大家可以放慢腳步係小店入面欣賞工藝品,見到適合的都可以帶佢地返屋企。


第2站:洪聖爺泳灘

每個離島區都總會有個沙灘,而南丫島都唔例外。一路由榕樹灣大街行十幾分鐘,就會去到南丫島上出名的洪聖爺泳灘。 泳灘上面都係遊人比較多,都會有唔少人在泳灘附近具有特色的石頭上面影相。


沙灘附近都有洗手間,洗浴間,如果想順便在呢度游下水都好方便。 同埋附近都有燒烤場,設備算完善~


第3站:建興亞婆豆腐花
由沙灘回程的路上,行行下就會見到南丫島其中一間好出名的豆腐花店!呢間人氣十足的建興亞婆豆腐花,由店主每日親製,熱品豆香濃郁,冷品口感嫩滑清甜,各有特色!行咁多路都攰,去豆腐花店食下豆腐花都唔錯!



唔單淨係得豆腐花架,都有豆漿同其他飲品,係一個幾好的補給站!


第4站:海鮮大餐

相信大家在南丫島行咗咁多路,天色都應該漸漸暗下來,而呢個時候就可以返去榕樹灣大街,在返回市區之前食返餐海鮮大餐啦! 榕樹灣碼頭出面有幾間海鮮餐廳,大家可以一路食海鮮,一路睇住日落,十分愜意!




南丫島遊玩路線B:2小時橫越小島

如果唔想齋行,想挑戰下難度做下運動的話,都可以選擇路線B,即係在索罟灣下船,再沿著南丫島家樂徑行到榕樹灣啦!不過小編提提大家,山路上唔少斜路(索罟灣到榕樹灣大街全程約4.4公里),雖然路途中都有賣零食的小店,但多數只會在假期營業,所以大家需要準備充足先好出發呀!


第1站:索罟灣

落船後,就會見到唔少餐廳同手工藝品小店,大家可以在行山之前食餐海鮮餐,或者買D地道紀念品先。而再行多幾步,就會見到南丫島漁民文化村,這是索罟灣養魚區內最大的漁排,村内設有多項漁民相關的展覽和導賞團,亦有海上教室如捕夢網、鹹柑桔、鹹魚和傳統織繩,出發前可先在網上報名相信大家都在南丫島可以體驗到市區冇的有趣活動!



第2站:天后廟

參觀完導賞團,行山前都可以參觀下這座歷史悠久的天后廟。據聞之前漁民出海捕魚前,都會在此向掌管大海的天后娘娘祈求平安和豐收。



第3站:觀景台

沿著南丫島家樂徑走上山頭,好快就會到達觀景亭。大家可以在這裡小憩一下,順便睇下風景。在呢度,可以見到對岸的香港仔、淺水灣、海洋公園架!


第4站:洪聖爺灣泳灘

行行下,就會見到剛剛在上文提及的洪聖爺灣泳灘啦!身為南丫島出名的沙灘,呢度唔單水清沙幼,仲有清爽海風,行完山黎呢度休息下都係唔錯選擇!如果大家行完山時間已經唔早,話唔定仲可以在這裡見到日落呀!



第5站:南丫風采發電站

提起南丫島,當然不得不提位於南丫島大嶺的港燈南丫風采發電站啦!此為全港首台具商業規模的風力發電機組,在榕樹灣與洪聖爺灣之間南丫警崗十字路口左轉沿車路上山,再走大概十多分鐘即能到達。如果平日冇做開運動,這段長命斜定必給你一個難得的鍛煉機會。


風站設有展覽設施,介紹風力發電同埋顯示即時發電數據。大家亦可登上附近山頭,由另一個角度欣賞風力發電機的壯觀,景色都唔錯~



終點:榕樹灣大街

行完山,大家應該都需要休息下。呢個時候就可以去返榕樹灣大街(詳情前文都有介紹),搵間特色餐廳坐低食下美食,又可以去下文青小店,最後可以在碼頭睇下南丫島日落,度過非常愜意的一日!




唔知大家睇完呢篇南丫島攻略,又諗好點樣玩轉南丫島呢?無論你係行休閒路線,定係運動路線,都可以於假日去南丫島玩!

 


熱門文章




關鍵詞:
香港 【南丫島一日遊】最詳盡的南丫島交通、景點、美食攻略  香港   香港   香港