一個人旅行似乎已經唔係咩新鮮事，上網book機票酒店，執好背囊，再攞個相機，第二日便可以出發。但出走之前，特別係獨遊嘅女仔，不妨留意一下以下幾個小tips～
1.選擇並了解目的地
揀一個啱自己旅行嘅目的地可謂十分重要。選擇目的地嘅時候不外乎要睇下當地治安情況、社會係咪穩定，同埋自己係咪負擔得起當地嘅物價水平。
決定出走之前，都可以學下一兩句當地語言，例如最常用的「你好」、「謝謝」同埋「再見」啦，去到目的地果陣都可以同到當地人溝通～ 除左語言，都要上網睇翻清楚當地嘅緊急求助電話，以防不時之需。
而最後一樣就係交通啦，獨遊次次搭的士都好貴，想慳錢又想體驗當地生活就要善用當地嘅公共交通工具啦。去之前可以了解當地交通方唔方便，有冇抵D又方便嘅pass買（尤其是係歐洲，買pass分分鐘抵過買單程票），同埋可以留意返首尾班車嘅時間，以免miss咗車返唔到去呀！
2.謹慎選擇住宿
自己一個旅行揀住宿嘅首要條件不外乎就係安全，而呢個時候就要善用評論功能啦！Book住宿之前記得睇下之前嘅住客嘅評論。睇完評論，就可以留意返間住宿嘅地址係咪近市中心，同埋果區治安狀況。而唔少人自己一個旅行果陣都會揀青年旅社，小編係度提提大家，部分青年旅舍係冇提供電梯架，如果你嘅行李係好大件又重嘅話，就要做好心理準備自己抬上樓啦！
而女仔都要留意返，部分青旅係冇提供風筒架！如果唔想帶風筒去旅行嘅女仔，就可能要朝早洗頭，或者睇下有冇咁好彩有roommates可以借比你啦！
而更加重要嘅係，留意返間旅舍有冇提供24小時check-in！小編試過book完之後先發現原來間旅舍係下晝3點先入得，而自己朝早10點就到達目的地，拍極門都冇人開，結果要自己一個拖住好重嘅gip係出面行，都辛苦架！
3.影印重要文件
出門在外，尤其是獨遊，最重要嘅貼身物品莫過於身份證、passport，同埋錢銀啦！而外出之前，不妨影印多幾份證件旁身，尤其是去D治安冇咁好嘅地方，例如扒手盛行嘅歐洲，touchwood一個唔好彩比人偷咗證件，帶咪影印本證件都起碼冇咁麻煩！
4.保持適當嘅警惕
雖然呢個世界上有好多好人，但壞人都唔少架！尤其是係歐洲地方，一個唔覺意就會比人偷野。係人多嘅地方，例如地鐵，如果唔想比人偷野，書包記得擺係前面呀！
5.與至親保持聯絡
自己一個去旅行，的確係好正，但係身邊嘅人都會擔心。獨遊時與至親保持聯絡，share旅遊經歷又好，send相比佢地又好，唔單可以開心share，一出咗事都會有個保障。
6.影相靠自己
相信唔少人去旅行果陣都會影好多靚相，獨遊果陣影風景固然容易，但係想幫自己影相就要比D心機啦！
你可以選擇自拍，但係相信有經驗嘅人都知道自拍始終有佢嘅限制，包括唔可以影到全景啦、影唔到自己想要嘅角度等等啦！
而都可以搵路人幫手影，但係揀路人果陣都要小心，尤其是係治安唔好嘅睇翻，一個唔好彩搶咗你部機就慘。小編就會建議揀返一D有小朋友嘅family，或者係同你一樣都係去緊旅行嘅旅客，被偷嘅機率會大大降低。
而如果你係對照片有份執著，一定要影到好靚嘅話，就可以係自備腳架啦！呢個亦係小編最常用嘅方法，但前提就係你要夠厚面皮，先可以係眾多旅客面前對住腳架係咁影相～
7.儘早返旅舍（尤其是獨遊女仔）
有D地方一到咗夜晚，人就會少咗，變相就會冇咁安全。尤其是係自己一個旅行的女仔，呢個時候最好都係早D返旅舍啦～如果真係好想欣賞當地夜景，又咁啱住青年旅社嘅都可以睇下識唔識到朋友可以一齊出去啦！小編係巴黎果陣，超級想睇巴黎鐵塔著燈果下，但又驚太夜返去危險，都好好彩識到個同樣都係自已一個旅遊嘅roommate一齊出去。
8.藥袋不能少
自己一個人旅行果陣最唔想遇到嘅就係生病。無論去長途旅行定短途，不妨都帶定個藥袋，以防不時之需。要照顧好自己嘅身體，先可以玩得開心架嘛！
9.買旅遊保險
你可以能話，我只不過係去觀光炸嘛，洗乜要買個成幾百蚊嘅保險呢！但係世事難料，你永遠唔會知道旅行果陣會發生D咩，加上係自己一個旅行，用錢買個安心，何樂而不為呢？
其實一個人旅行唔單淨係去玩，更加重要嘅係果份踏出自己comfort zone嘅勇氣同決心。經歷過一個人旅行之後，你可以能會愛上佢，又或者可能下次都唔會再試。不過都係果句，記得做足以上功課，好好enjoy你嘅旅程啦～