現象級人氣動漫《葬送的芙莉蓮》終於嚟到香港喇！由 2026 年 11 月 24 日起，《葬送的芙莉蓮特展》香港站會喺旺角創興廣場 INCUBASE Arena 隆重登場，現場完美還原第一季動畫多個經典心動名場面，仲有得親手攞起角色實體化武器打卡，各位動漫迷放假絕對唔可以錯過呢個超正嘅展覽！
《葬送的芙莉蓮特展》香港站
| 活動日期 | 2026 年 11 月 24 日 至 2027 年 1 月 3 日 |
| 開放時間 |
星期一至五：12:00 - 21:00（20:00 最後入場）； 星期六、日及公眾假期：11:00 - 22:00（21:00 最後入場） |
| 地點 | 香港九龍旺角彌敦道 601 號創興廣場 B2 樓 INCUBASE Arena |
| 交通方式 | 旺角站 E1 出口步行即達 |
6大亮點逐個睇：
(本篇場景配圖為台北站實景相片)
1. 精心打造 5 大主題展區
展覽以動畫第一季核心劇情為主軸，帶領大家由「冒險起點與半世紀流星」出發，漫步到「全新冒險的開始」、「葬送的芙莉蓮」、「僧侶與鏡蓮華」及「一級魔法使測驗」，回味芙莉蓮與夥伴們漫長嘅冒險旅程。
2. 極浪漫名場面立體還原
現場設有多個超經典打卡位，包括被滿地藍色花海包圍嘅「欣梅爾石像與蒼月草」，仲有欣梅爾單膝跪下為芙莉蓮戴上「鏡蓮華」戒指嘅心動名場面，全部都真實重現喺大家眼前！
3. 必影搞笑「寶箱怪」打卡位
展區除咗可以回顧勇闖「零落的王墓」嘅緊張過程，仲特別打造咗超盞鬼嘅實體「寶箱怪」，等大家可以親身體驗被寶箱怪咬住嘅呆萌搞笑瞬間！
4. 核心角色武器實體化
特展超有心思咁將 3 位主角嘅武器真實重現，包括芙莉蓮嘅魔法手杖、費倫嘅手杖同埋修塔爾克嘅巨型戰斧，粉絲可以親手揸住武器擺 Pose 影相留念！
5. 期間限定店
場內特設期間限定店，發售多款角色精美周邊，屆時更會推出大量香港首發商品，等粉絲睇完展覽可以盡情掃貨帶返屋企！
6. 魔法問答活動互動體驗
展區內設有「踏上旅途魔法問答活動」，沿途設有 5 處關卡，入場觀眾只要拎住魔法問答卡一邊探索一邊完成任務，就可以獲贈限定明信片一張（一共 7 款，每日隨機派發）！
一於放假約埋朋友/另一半去打卡，一齊重溫感動喇！
延伸閱讀：